功夫茶:盲目谷針瞎折騰 堵塞源頭要禁飛

2021年04月19日 00:04
東網電視
更多新聞短片
新冠肺炎第4波疫情又彈上,尋日新增30宗確診個案,當中僅有一宗本地個案,係一名31歲女子,居佐敦被驗出帶有N501Y變種病毒株,為首宗流入社區變種病毒株個案29歲印裔工程師嘅朋友,餘下29宗全為輸入個案。
好明顯,疫情反撲來勢洶洶,專家擔心第5波疫潮即將引爆!變種病毒攻入社區,一直抗疫不力嘅食衞局局長陳肇始依然充當盲人司令——瞎指揮!佢淨係喺社交媒體稱當局關注事件,務求盡快阻截擴散,再三呼籲市民盡早接種疫苗。政府一面谷市民打針,之前卻剛愎自用拒禁飛,任由高危地區如印度、菲律賓、巴基斯坦等南亞國家嘅人士抵港,無視專家一再警告!呢,一橋之隔嘅澳門已率先宣布今日零時起,規定經印巴菲入境者須隔離28天,澳門果斷防疫,永遠走在香港前面!人家連續長期保持清零豈是符碌?
嗱!功夫茶睇到疫情彈上,29宗都係輸入,得一宗本地感染,仲要係畀男友人從杜拜來港傳染到!可見本地個案嚴格而言根本唔多,長期都係單位數甚至試過零確診,咁即係話,如果輸入個案唔入本地數,庸官又能果斷拒絕疫情嚴重嘅南亞航班來港,香港清零不是夢,粵港澳三地通關亦指日可待,唔係一味只聞樓梯響也。
廢官抗疫無能,一味折騰市民!日前推出疫苗氣泡,未見其利,先見其害;團體批評政府無良,將放寬食肆經營條件與疫苗掛鈎,等同用飯碗要挾員工。有政黨更指政府口話不強迫市民接種疫苗,之不過疫苗氣泡政策與政府承諾背道而馳,特別係直接促使食肆老闆千方百計要求員工打針。有老闆就聲稱不願接種疫苗嘅員工只係「停工而非解僱」,好明顯又學咗廢官嘅巧言令色,稱放無薪假係「分享工作」嘞!據統計,依家飲食業有員工逾24萬,而當中至少有兩萬僱員為60歲或以上長者,佢哋當中若然患有「三高」或其他慢性疾病而不適合接種疫苗,但為了「保住飯碗」而去打疫苗,風險卻要自己承擔,僱主和政府看似毫無責任,咁公平咩!
事實上,廢官盲目谷針,折騰基層打工仔,本身防疫又漏洞百出, 疫情稍彈落就鬆毛鬆翼,完全漠視專家警告,兩款在港展開接種嘅新冠疫苗未足以應付部分變種病毒株,單靠市民打疫苗不足以抗疫!科興疫苗嘅成效亦一再被質疑,不是有一名63歲男子接種第二劑科興7日後確診嗎?再講啊,根據全球各地經驗,不少接種率高嘅地區疫情未見遏止,智利便是一個例子,每100人接種最少62劑科興疫苗,之不過每日感染個案反升逾一倍!依家變種病毒殺入社區,廢官唔從速堵塞源頭漏洞一味谷人打針,本末倒置,如此玩殘打工仔,唔鞠躬下台仲有何面目悄悄加薪?