功夫茶:有書唔讀搶金鏈 學人做賊搵快錢

20210502
東網電視
更多新聞短片
英國作家哈代有首小詩,寫嬰兒初生,大家譽其為珍珠寶貝,稍長又誇佢玉樹臨風,長成卻為非作歹,終至陳屍絞架。中國民間則流傳「小時偷針,大時偷金」嘅故事,講嘅係為人母者,見孩子攞人家嘅小東西,不但不加制止,仲讚佢叻叻豬,結果個細路長大後偷金盜銀,犯咗死罪。臨刑時,佢藉口想吃母親最後一口奶,卻將母親乳頭咬掉,以此責怪阿媽「養而不教」,令佢走上絕路!
嗱!個民間故事是否合情合理,畢竟仍有商榷餘地。之不過,人心不古,世道衰微,卻係珍珠都冇咁真!呢,上個月29號大埔廣場就發生金舖劫案,兩名賊人分別假扮客人,聲稱揀選金鏈,期間趁機搶走兩條總值約5.6萬元嘅金鏈。警方將案列作搶劫,並於案發後6小時迅速破案,先後拘捕5名涉案少年,年齡由14至17歲,都係所謂「叛逆」年齡或所謂「危險17歲」!
根據警方事後調查指出,發現案中除兩名負責落手作案嘅賊人外,另有3名同黨在附近一帶「睇水」。警方鎖定目標人物後,於案發當晚成功喺大埔區拘捕該3名負責睇水嘅少年,年齡14至15歲,分別就讀中二至中四。警方再於4月30日突擊搜查兩個單位,成功拘捕該兩名進入金舖落手搶劫嘅?仔,兩人分別15及17歲。
警方發言人指出,5名被捕少年分別就讀4間中學,透過朋友介紹而認識,依家5人正被扣查,案件交由大埔警區刑事支援隊跟進。警方留意到呢單畸士涉及未成年中學生,有計劃及分工地犯案,當中有人持有僥倖、搵快錢嘅心態,守法意識薄弱,情況危險,呼籲青少年切勿以身試法,以致前途盡毀,並強調盜竊罪為嚴重罪行,一經定罪最高可被判罰監禁10年。
警方都算苦口婆心,呼籲少年人不要盲目衝動,坐監絕不會令「人生更精彩」!年少無知,即使唔想讀書,香蕉成熟時,頂多見到狗仔起勢追,如果命運能選擇,點解會諗起不勞而獲「搵快錢」,有書唔讀搶金鏈?嗱!講開又講,黑暴期間,年輕人打砸搶燒、「私了」成風,法治意識薄弱,不!根本就冇!犯法仲理曲氣壯以為係「守道」,孰令致之?有人就話喇,大人都唔做好榜樣,資深大律師都知法犯法,明明非法集結都係判緩刑,變相獲放生啫,不是說「知法犯法理應罪加一等」嗎?
阿哥,「法律面前人人平等」既然淪為空談笑話,咁又點怪得啲青少年視法律如無物,價值觀扭曲?反正博一博單車變摩托,小時偷針,大時偷金,偷吓偷吓就變大賊大毒梟!政府呢個慈母,再係咁亂放生大漢奸大毒梟,小心乳頭不保吖!