功夫茶:天子門生變暴徒 離港升學免迷途

2021年06月11日 00:04
東網電視
更多新聞短片
功夫茶今日要講嘅係「天子門生」,本來係指科舉時代啲狀元或者由皇帝親自考試錄取者,後世廣泛用來形容考入大學的尖子。大學生在香港本來好吃香,但隨住時日,依家講起大學生,大家不期然聯想起黑暴,霸佔中大、理大校園同警方開戰的畫面歷歷在目。
前年爆發嘅反修例黑暴潮活動被捕逾萬人,當中學生人數接近4,000人,唔少係大學生嚟㗎,天子門生變暴徒,總之世說新語,今時今日「後生可畏」原來咁解,如果你係僱主,夠唔夠膽請班黑暴返嚟做嘢?根據官方公布,15至24歲人士嘅失業率高達15.6%,失業人數達35,500人,當中應屆畢業生約佔10,400人,畢業變失業,有個重要原因係本地大學生形象一鋪清,有企業老闆講明唔請呢幾年畢業嘅大學生,因為擔心佢哋較為偏激啊。
十幾年寒窗苦讀,竟然冇人敢請,咁讀嚟托咩!上咗賊船就話冇得轉啫,未讀嘅自然會另謀對策,離開香港去其他地區讀書,都未嘗唔係一個選擇,再加上香港立立亂,家長索性諗埋移民,近年海外升學同埋移民資訊嘅查詢較以往增加七成,英國、加拿大有移民升學配套固然吃香,甚至德國都有人問津。
就算冇錢浸鹹水,返內地都係一個出路,起碼唔會有同學甚至師長叫你上街搞事掟汽油彈,讀讀吓唔會變暴徒,專心鑽研學問,呢啲先係學生應該要做嘅事。嗱,事實證明,今年文憑試考生當中有4,000幾人報名內地高校文憑試招生,比去年多近兩成,佔文憑試考生比例約一成,創10年新高。
今年有7,583人參加北京大學、清華大學、復旦大學、中山大學、暨南大學、華僑大學嘅自主招生計劃,最熱門嘅科目係經管金融、工程以及醫學。呢啲大學都響噹噹,實力比香港嘅大學可能有過之而無不及。呢,國際高等教育資訊機構公布最新嘅「世界大學學科排行榜」,內地清華大學及北京大學分別排行第17及第18位,香港最高嘅香港大學只係排第22位,而本港7間上榜嘅大學,有4間排名係下跌嘅。有團體指出,過去兩年唔少大學教職員同學生參與社會動亂,將時間精力花喺搞事,梗係影響教研質素啦。唔使講其他,佔中三子被判有罪,包括香港大學前副教授戴耀廷,同埋中文大學前副教授陳健民,就係活生生人辦啦!
十年樹木,百年樹人,教好一個人有幾難,大家都知,但教壞一個𡃁仔變暴徒,原來咁容易,古代有孟母三遷以免個仔學壞,今日嘅家長冇鞋挽屐走,趕住送仔女出外升學,甚至舉家移民,用心良苦,惟嘆一句,可憐天下父母心!