功夫茶:食環署怠政成癖 滅蚊患一味靠估

20210723
東網電視
更多新聞短片
老鼠捉唔到,蚊患冇晒符!你話食環署存在有乜意義?古人就話「人無癖,不可與交,以其無深情也」;之但係食環署都有癖喎,點解又成日畀申訴專員噴到一面屁?哈哈哈,功夫茶大笑三聲,就係因為佢哋都有「癖」,怠政成癖囉!本報過去曾多次揭發食環署偷懶成風最猖狂,尤其防治蟲鼠隊人員當值時打麻雀、打邊爐、隊酒玩骰盅,花款之多,目不暇給。明啦:食環署存在就係生動演繹「蛇鼠一窩」呢個成語!
食環署呢個「蛇王成癖」,同佢深交咯,咪搞到「沉沉夏夜蘭堂開,飛蚊伺暗聲如雷」囉!申訴專員公署尋日發表主動調查報告,發現3個監察地區中,食環署防治蟲鼠隊不同職級嘅巡查人員,均出現巡查紀錄不完整等情況,馬鞍山區於前年更曾經連續4個月無巡視紀錄,唔怪得之成為蚊患「重災區」。
報告指出,經審視3個監察地區,包括黃大仙、屯門西及馬鞍山,發現負責突擊巡查馬鞍山承辦商防蚊滅蚊隊伍嘅衞生督察,原應至少每兩個月巡查一次。但翻查紀錄,前年1至4月該區嘅巡查次數係零。阿哥,咁仲唔係「怠政成癖」?公署強調今次單單抽查3個地區,便已發現唔同職級嘅巡查人員有上述問題,仲唔係「蛇鼠一窩」?批評食環署監管不力!3、4個月都唔蒲頭一次,係「監管不力」嗎?根本就係尸居餘氣啦!
此外,公署又指食環署「勞而無功」,只監察白紋伊蚊嘅「誘蚊器指數」,雖有訂立級別但冇向公眾公布。現時全港64個監察地區,放置咗3,440個誘蚊器,唔好忘記,呢啲誘蚊器只能捕捉到白紋伊蚊,不適宜亦不會捉到其他品種嘅蚊子。咁有乜卵用?嗱!滅蚊都要把眼光放遠啲,白紋伊蚊係登革熱病媒蚊,之不過,仲有機會引致日本腦炎嘅三帶喙庫蚊、有機會引致瘧疾嘅按蚊等。
食環署解釋,呢啲蚊子喺香港相對較不普遍,食環署會喺唔同地方,視乎呢啲蚊子嘅棲息習性,然後捕捉佢哋,評估風險喎!申訴專員指出,全港約有70多個品種嘅蚊,除咗白紋伊蚊,其他蚊嘅蚊患程度如何,食環署一味斷估冇辛苦,又冇監察統計,要靠市民投訴先知邊度蚊患嚴重,這不是「坐觀其變,而不為之所,則恐至於不可救」嗎?要言之,即係佛系治蚊!功夫茶認為太陽能滅蚊機既環保又係滅蚊好幫手,好心喺郊野公園、屋邨公園、公廁等廣泛安裝,殺蚊效果頂呱呱,真係幫到手!好過空口廢噏,而群蚊喧騰鼓舞又轟至!