笑看天下:盲推租管 吃力不討好-施友朋 評論員

2021年09月15日 00:05
東網電視
更多新聞短片
香港政府成日話「民生無小事」,卻從不用心去規劃有關民生嘅「大事」。呢,政府早前建議修例管制劏房租務,但修例草案甩漏甚多!本報一早已指出,若然盲推租管劏房,只會令業主加租迫遷更狼!
本報曾多番指出,草案冇訂立起始租金,由立法至實施存有空窗期,恐引來無良業主大幅加租,豈非幫倒忙?此外,續租時容許嘅15%加租上限,亦超出基層承擔能力。面對草案劣評如潮,政府日前終於「跪低」,建議將續租時加租上限,由原本嘅15%削減至10%,並承認法例空窗期可能達3個月。有劏房居民認為,續租加幅上限減至10%係「聊勝於無」,佢以葵青區一間80至100平方呎嘅劏房為例,每月租金約5,000至6,000元,若然加租10%,都要畀多500至600元,喺依家搵食艱難嘅環境下,相信對劏房戶難免造成負擔。
據悉,十個劏房戶中有兩至三個,收到業主通知要喺修例前加租,咁就真係「好心做壞事」,是以有立法會議員恐劏房戶無議價能力,被無良業主大幅加租,促當局盡快推行新例,縮短空窗期。
事實上,租管草案劣評如潮,劏房戶形容自己肉隨砧板上,劏房業主則表明新例實施後會退出市場。政府拒設起始租金,被劏房戶轟離地,關注團體又感失望,庸官施政可謂吃力不討好!
古人說,政如農功,日夜思之。 就是說從政要像農民一樣上心,播種過後,還要日夜操心,思慮周到,才會有收成!農功之思反映在對農事籌劃、安排、管理嘅全過程,不違農時,要注意風旱、雨雪,也只有夙夜在公,殫精竭慮,才能有收成!依家盲推租管,考慮不周,業主鑽漏洞,劏房戶提前受加租之苦,真係唔衰攞嚟衰吖!