功夫茶:黃師荼毒教育界 撥亂反正要夠快

2021年10月16日 00:04
東網電視
更多新聞短片
一提起香港教育,「千瘡百孔」呢個詞實走唔甩!其實,自2019年黑暴以來,再提起香港教育,更令人深感病入膏肓,唔病唔病,一病攞命!由幼稚園到大專教育,無處不充斥着黃師!如果話「教不嚴,師之惰」,咁,管不善,一定係教育局監管不力、放任自流之過!
講真,潛伏喺教育界嘅黃師,實在多如天上繁星,根本難以一一去數清楚。教育界黃師肆虐,反中亂港勢力深入校園,已是不容爭辯嘅事實。各位,一場反修例黑暴,被捕嘅學生多逾4,000人,當中甚至包括年僅11歲嘅小學生!阿哥,香港教育糜爛成咁,都真係多得黃師喺課堂上播獨,致令咁多學生被洗腦做咗炮灰。嗱!教協同黃師固然係罪魁禍首,然則教育局又豈能辭其咎?教育局對失德教師一直都「大愛包容」,見「勢頭唔對」,幾經「內心掙扎、思想鬥爭」,先有零星幾個黃師被釘牌!根本不成比例。
教育局監管無方!功夫茶絕非無的放矢!回想反修例黑暴期間,有中學生發起「全港中學人鏈行動」,共有好幾十所中學參加,手牽手築起長約2.2公里嘅人鏈!參與嘅更不乏傳統名校。2020年,連老牌愛國學校九龍塘香島中學,都有成百人喺校外築人鏈聲援疑因允奏《榮光》而不獲續約嘅教師!據統計,當其時全港至少208間學校參與築人鏈組成所謂「自由之路」!歪風已入侵中學界彰彰明甚。
各位,教育局咁都睇唔到問題嘅嚴重?而教育局局長又冇立刻從速整頓,咁算唔算係失職?當其時,有份參與嘅學校,其校長、主任、教師們難道又可置身事外?黃師充斥整個教育界,已如蝗禍人皆見之!《施政報告》依家先提出要加強教師專業操守,由下學年度起,公營學校嘅新聘教師必須通過《基本法》測試方獲得聘請。
阿哥,咁算係「亡羊補牢」?教育局局長楊潤雄尋日喺一個電台節目表示,測試暫時適用於公營學校,並會參考公務員招聘嘅考試準則,長遠會推展到直資學校及幼稚園等。佢仲補充,過去一段時間,社會有聲音要求學校做好國民及國安教育,教師作為學生嘅引導者,對《基本法》要有一定認識,所以有呢個安排。
其實,教師通過《基本法》測試,甚至宣誓效忠《基本法》又如何?若然教育局多啲巡視學校,發現問題,立刻問責校長,並撲滅於萌芽時,咁黃師自然難以突圍搞搞震!之不過,教育局甚至連「毀人不倦」嘅黃師都唔夠膽開名公告,撥亂反正又唔夠快狠準,一味和稀泥,則香港教育永遠只會淪為生蟲拐杖──靠唔住!