笑看天下:食餅乾會冇咗個未來-施友朋 評論員

2021年10月20日 00:04
東網電視
更多新聞短片
天啊!做乜咁大整蠱吖?食餅乾會冇仔生?乜食開嘅幾隻餅乾,全部成分可致癌!即使唔致癌、冇仔生,都會有高糖、高脂、高鈉「三高」!為何玩到咁大啊!講真,有邊個屋企冇一、兩包餅乾作不時之需吖?有邊位做傳媒嘅朋友,抽屜冇常備若干餅乾喎!誰知道,咁就出事?仲要冇仔生?
消委會測試市面上60款預先包裝嘅餅乾樣本,結果發現全部樣本都驗出喺加工過程中產生污染物,當中包括氯丙二醇(3-MCPD),以及基因致癌物環氧丙醇或丙烯酰胺;產生上述3種污染物係與油脂及高溫加工過程有關。有議員直指市民原本期望食安中心會為食品安全把關,但今次消委會嘅餅乾測試結果令人嘩然,當中唔少樣本更在市面售賣已久。難怪消息一出全城恐慌,紛紛檢查吓存貨有冇「結紮餅乾」先!
事實上,食安中心經常被批評後知後覺,有唔少問題食品出事,喺澳門發現先或新加坡發現咗再通知香港食安中心,佢哋才如夢初醒!呢,依家為港人把關「食安」嘅,好似係消委會多過食安中心。早年內媒踢爆內地啲米普遍存在鎘超標,日食3碗「鎘米飯」將損害腎臟和膀胱。當時食安中心仍好整以暇,冇加強抽查內地米;結果又係消委會醒目,測試發現最少3款「鎘米」流入市場。
今趟「餅乾當飯食冇仔生」事件,再一次證明消委會好嘢!而食安中心監管不力,名不副實,難道成個部門全部都係不務實嘅閒人,如此把關食物安全,港人嘅健康真係凍過水!人為嘅「食品污染」係一種對人類健康和道德底線嘅無聲挑戰,竟然發生喺文明城市香港?有誰會料到食餅乾會冇咗個未來?食安中心,唔該醒少少啦!