功夫茶:吸引力跌跌不休 外資撤港人出走

2021年11月25日 00:03
東網電視
更多新聞短片
朝代興亡,煙雨樓台,涕淚喪亂,使歷史驚動。香港,曾經係東方一顆閃亮明珠,太平山下萬家燈火,霓虹招牌,不但吸引無數旅客,更曾溫暖無數南下嘅百姓,佢哋喺呢度創業興家,「香港幾好都有,點捨得走」!然而,一切已隨風飄逝。
呢嗱!日本一個財團最新公布「2021全球城市實力指數」,香港首次跌出全球最具吸引力城市前10名,喺亞太區輸畀東京、新加坡、上海、墨爾本及悉尼。香港吸引力跌跌不休,「四面雲山誰是主,一頭霧水不知宗」,點解香港啲高官成日侃侃而談香港係「智慧城市」,更面不紅話係「創意之都」,用咗十幾廿年打造一個「西九文化區」,又話係全球規模最大嘅文化項目之一,淨係建築費都使咗200多億元,咁都唔夠人揮?依家10名不入,都真係令人跌碎眼鏡,一頭霧水矣!
據悉,「全球城市實力指數」透過包括經濟、適宜居住和環境在內嘅70項指標,對全球48個城市進行排名。該指數首5名排名不變,倫敦第一,緊隨其後係紐約、東京、巴黎和新加坡。嗱!香港作為國際金融中心,排名從去年第9名下滑至第13名,令人失望甚至失落!唔通係揸弗人,有疤痕?又或者庸官長期吹水,自以為好打得,實情係有姿勢、冇實際?好多政策講咗當做咗,言而無信,仲講乜鬼「實力」喎!
總之,衰起上嚟無路可退,一個疫情搞到全世界雞毛鴨血,因疫情導致航班近乎暫停,雖然指數中所有城市嘅國內外旅客人數都出現大幅下降,之但係香港旅客人數下降88%,係所有調查城市中跌得最甘!此外,由於反修例黑暴令社會動盪,民心不安,香港喺經濟自由方面嘅得分也下降,旅遊景點及購物餐飲選擇評比也下調!正一衰開有條路,趁你病,撻你訂囉!
一個城市嘅實力,講來講去,城市競爭就係要搶人才!你講科技創新,唔係話你真係見過Steve Jobs就掂!一個城市嘅實力,必定唔係吹出來而係長期規劃!當然,規劃要講可行及成效,譬如找出方法,因應人口變化帶來嘅各種挑戰如住屋、交通、教育、公共衞生、老人服務等!要創造城市實力,貴在行,而非把「願景」寫在雲上!
寫在雲上嘅願景,通常都不堅牢,彩雲易散也。香港自去年實施《港區國安法》以來,市場一直傳有外資撤出香港,尤其美國公司數目按年下跌近10%,屬2003年以來新低;經濟凋敝、社會撕裂,激發移民上升,除咗資金外流,自不然也有人才流失!港產官僚一老鼠一野豬之不治,仲有乜計令香港變得有實力同人競爭吖!