笑看天下:兒童自殺倍增隨想-施友朋 評論員

2021年11月25日 00:04
東網電視
更多新聞短片
看到近年香港兒童自殺數字急增,確實叫人心痛!他們才來到這世界沒有多少日子,為何就灰爆趕住結束自己嘅生命?老朽早前亦說,留意到今年開學僅僅兩個月,已出現10宗學童懷疑自殺事件,年齡介乎8至17歲。
兒童死亡個案檢討委員會日前發表報告,剖析了2016年至2018年發生嘅259宗兒童(18歲以下)死亡個案,當中有100宗屬於非自然死亡案件,最大類是死於自殺,有59宗,較對上一個3年(2013至2015年)共28宗,增加逾倍;其次係意外,佔22宗;而在7宗涉襲擊致死亡嘅案件中,有4宗係遭母親殺死。
據悉,兒童自殺原因涉及多方面,學業問題佔最多,其次係家庭關係、精神健康、憂慮未來等。老朽成長嘅60年代,生活肯定比依家艱難,那時候沒有甚麼社會福利,住山區木屋、板間房多的是,父母外出搵食,大嘅照顧細嘅,老朽喺一本60年代嘅舊照片圖冊,見到有十二、三歲少年在街邊賣滷水雞腳、鴨腎,也有女童背上孭一個、手拖一個過馬路!那個年代,並沒有聽過「兒童自殺亡」嘅新聞!做家長的也不懂呻,「鬼叫你窮呀,頂硬上啦」!日做夜做,一身兼數職,也就這樣挺過來!當中,也有唔少把子女培養成材「搵到食」而改變一生!
也許時代不同,當今的兒童,中產階層都怕自己的孩子輸在起跑線,幼兒時期已拚命催谷,以致出現「怪獸家長」!老朽係「自然派」,總覺得應讓孩子們自由發揮,成長過程不要過於催谷,各人天性稟賦不同,順其個性最緊要,真係讀唔成書就學一門技藝,而學校亦應為孩子建立正確嘅人生觀和價值觀!可惜,唔少為人師者對住學習有障礙嘅學生,一開聲就係:你哋唔努力讀書將來就搵唔到食!