笑看天下:一腳踢開老朋友不足惜-施友朋 評論員

2021年11月26日 00:04
東網電視
更多新聞短片
79歲嘅美國總統拜登上台未滿一年,白宮發言人普薩基證實佢老人家計劃喺2024年競選連任!老朽一直擔心,以拜登身體毛病多多,行步路都唔穩,能否完成4年總統任期頗成疑問。而前白宮醫生傑克遜曾經喺一個電視節目上表示,如果拜登進行認知測試,可能會表現不佳。這不是暗示佢有老人癡呆嗎?
其實拜登健康備受質疑已非甚麼新聞,佢喺空軍一號登機時一步一跪「三連摔」,多次喺公開場合語無倫次,答非所問,講真,點止係「口誤」咁簡單!此外,佢喺公開演講咳嗽、不停清喉嚨;行路步伐僵硬,甚至惹來「中風」嘅傳聞。
老人家一年唔知一年事,貴為美國總統,醫療一流都係咁話!喺民望持續下滑,身體健康又備受質疑下,若然仲想「老驥伏櫪,志在千里」,3年後競選連任,老朽只能認同美國前國務卿基辛格所說的名言:權力是強烈嘅催情劑!問題係拜登恐怕虛不受補,勉強催谷好易出事!
之前老朽指拜登言而無信、不誠無物,退一步想,也許並非佢想咁做,只係「習慣失憶」,譬如冇幾耐前先同中國領導人視像會面數小時,又拍心口承認「一個中國」;然而,轉個頭又大打「台灣牌」!呢,由佢主持嘅首屆民主峰會將於下月以視像形式舉行,華府邀請了約110個國家和地區出席,台灣有份,而中國大陸、俄羅斯等則未獲邀。中國大陸外交部除一貫嘅「堅決反對」外,並警告美方與「台獨」一起玩火,終將引火燒身。有分析指,拜登繼續打台灣牌是為了討好選民,與習近平視像會面亦不等於「親中」。事實上,奧巴馬時代宣稱要重返亞太,拜登繼承呢個衣鉢更加明顯,美國呢個「老朋友」,一腳踢開亦不足惜也。