功夫茶:恐嚇信絡繹不絕 廢政府束手無策

2021年11月27日 00:04
東網電視
更多新聞短片
末世之下,必有妖孽。過去一個星期,高等法院及區域法院接連不斷收到懷疑肉碎恐嚇信;尋日10點幾,警方又接獲長沙灣派遞局職員報案,指收到一封懷疑內有肉碎嘅可疑信件,係3日內第2次發現寄往西九龍裁判法院嘅恐嚇信。
呢,除咗法院,之前兩名立法會選舉建制派候選人,亦分別喺本月24及25日收到內藏懷疑肉碎嘅信件,信件來自台灣。警方表示,案件將合併交由有組織罪案及三合會調查科跟進,暫時無人被捕。
呢啲咁嘅恐嚇信,話就話「姿勢多於實際」,之不過,收到信嘅法官、名人難免忐忑不安,要是下次寄來嘅係炭疽粉等有毒物質,唔覺意揩到都大鑊㗎!功夫茶忽有妙想,有經濟能力嘅法官名人,應添置智能機械人負責開信拆包裹!
恐嚇信如雪片咁喺台灣飛來,潛逃台灣嘅黑暴分子事後喺網上囂張承認責任,有個自稱「何歡喜」嘅人,仲喺網上留言恐嚇「要炸到香港警察體無完膚!蟈安處(國安處)亦無一幸免」!講真,呢個「何歡喜」表面狂妄不可一世,實際係魯迅筆下討厭嘅蚊子,連跳蚤也不及,皆因跳蚤來吸血,雖可惡卻不聲不響就是一口,直接爽快!不似蚊子未叮之前,要哼哼發一大篇議論,何其討厭!
「何歡喜」究竟係何方妖孽?消息指佢嘅真名姓范,曾加入「學民思潮」,喺2019年反修例黑暴期間,喺網絡上活躍,「理大圍城」後潛逃台灣,現正於台灣一所大學修讀社會科學系喎。黑暴之後,台灣都唔知收留咗幾多「何歡喜」,佢哋用髒嘴躲在暗處亂放炮,係如假包換嘅懦夫,因睇穿香港和台灣冇逃犯引渡協議!人在台灣,「來捉我吖笨!」警方都冇計。
黑暴囂張狂妄,說到底都係香港處理黑暴案件進退失據,早期唔少黃官判刑太輕甚至有意放生,迨至《港區國安法》後才改弦易轍,遲唔遲啲呀!若然一早「治亂世用重典」,而唔係警察拉人、司法放人,「何歡喜」之流嘅肉信恐嚇早就收檔,又點可能搞到依家牙斬斬,令其達到精神自瀆嘅快感吖!
話時話,逃往台灣嘅「何歡喜」固然多,而律政司檢控無能,潛藏喺香港嘅黑暴「何歡喜」肯定比逃竄往外地嘅更多!呢班黑暴分子,多得港府一直唔嗲唔吊,冇喺佢哋未萌芽時就遏止,甚至任由一班妖人廢噏乜嘢「違法達義」、「暴力有時或可解決問題」,結果年輕人有樣學樣,動輒訴諸暴力!大家都睇到啦,有啲被判囚嘅黑暴年輕人,即使讀過大學依舊「永不言悔」,就知香港教育何其失敗,而放縱暴力必自食惡果!