功夫茶:公務員良莠不齊 設學院能治本否

20211128
東網電視
更多新聞短片
時代在變,《港區國安法》出台後,加上要完善選舉制度,強調「愛國者治港」,香港是否能由亂轉治,高官不會淪為忠誠嘅「高薪廢物」而係「能者居之」?至於龐大嘅公務員隊伍,又是否能做到「善於作為、勇於承擔」呢?
事實上,香港公務員制度由港英時代過渡而來,97年回歸至今並無太大改變,至今不過係要求公務員宣誓擁護《基本法》、效忠香港特區而已!講真,當中難保沒有為了「鐵飯碗」而宣誓如儀者,「上下一心」嘅團結精神更不知從何說起!呢,不久前水警高級督察林婉儀因追截走私快艇時墮海殉職,有紀律部隊人員涉喺網上發表嘲諷言論,先後有8人被停職查辦;又有公僕涉用假安心出行進入入境事務大樓,可見公僕良莠不齊,彰彰明甚!
呢嗱!公務員事務局局長聶德權尋日喺一個電台節目表示,下月中前會成立公務員學院,下周正式招聘院長,料明年上半年到任,而現時位於北角嘅公務員培訓處會完成改造,成為臨時選址。聶局長透露,公務員培訓諮詢委員會早前因應培訓框架提出建議,包括喺國家事務、憲法和《基本法》等方面推出更新課程喎。
依家院長都係開始招聘緊,真正課程仍在建議中,究竟用一大筆公帑去培訓公務員嘅忠誠及團隊精神,是否能確保佢哋效忠特區政府呢?嗱,聶局長指去年公務員離職比率為1.1%,較前年多幾百人,但認為情況係預計之內,相對18萬公務員,濕濕碎而已!道不同,不相為謀。功夫茶都覺得黃公僕離開係好事,起碼唔會「身在漢營心在曹」,又唔會成日諗住「籠裏雞作反」,少咗「吃飯砸鍋」畢竟係好事!
要令公務員形象清廉討好,愛國愛港,團結一致,做事唔hea;各位,功夫茶唔信有間公務員學院就可安車平五路!道理一字咁淺,內地夠有「黨校」啦,校長人才更係一時之選,國家主席親臨訓話指導閒過立秋,之不過,內地貪官嘛,「老虎蒼蠅一起打」,力度不可謂不大,可惜至今依然打極都有!所以話,靠一個公務員學院,就想培訓一支「忠於香港、勇於承擔」嘅優秀公僕隊伍,未免妙想天開!
阿哥,唔好忘記,香港投入咁多資源喺大專教育上,結果又係培養出一大班黑暴,即使收監都「永不言悔」!毛澤東話要靠正確解決問題,不靠資格!香港要見到大治,功夫茶認為係要正確分辨誰是真正有家國情懷嘅愛國者,而非沽名釣譽完全冇一點風清氣正嘅「愛國者」!阿爺能喺「正確」上下工夫,香港就唔使咁閉翳!