功夫茶:油塘居民空歡喜 港府補鑊堅離地

2021年11月30日 00:03
東網電視
更多新聞短片
《東方日報》早前以頭版踢爆油塘嘅混凝土廠導致區內沙塵滾滾,10萬居民日日食塵,終於促使環保署「跪低」補鑊。點知環保署做啲唔做啲,明知有關公司持有兩個牌照,都只係拒絕其中一個續牌申請,唔係諗住側側膊唔多覺呀嘛。東方傳媒機構向來視為民請命為己任,雖則話港府施政不嬲喜歡半途而廢,唔算咩新鮮事,但眼見油塘居民叫苦連天,東方又豈會漠視,功夫茶決定仗義執言,好好鬧醒成班扮瞓嘅廢官。
油塘近年嚟有唔少住宅項目落成同入伙,居民愈嚟愈多,之但係源於港府規劃失誤,區內基建配套不足都不在話下,3間混凝土廠長期運作兼夾屢次違規,搞到空氣質素每況愈下,啲水泥車出出入入唔單止阻礙交通,又造成噪音問題,更容易變成安全隱患,尤其是威脅小朋友嘅安危;大家都知係細路仔都鍾意落街玩,附近又唔夠公園球場,能見度又差,喺街玩玩吓,一個唔覺意走出馬路,到時發生咩事先嚟追悔莫及咩?再講,小朋友成長需要良好環境,就算無藍天白雲,都唔好話出親街搞到成面灰,久而久之,唔中肺炎都患矽肺病啦!
城市發展並唔係話「先入」一定「為主」,油塘地理位置優越,交通便利兼有無敵大海景,區內工廠早已逐步搬走,混凝土廠搬遷其實都係大勢所趨,只不過港府視若無睹,結果居民頻頻投訴,環保署照樣闊佬懶理。直至東方早前出手鞭策,環保署先肯郁手做嘢,功夫茶嗰陣都以為官員之後識「自動波」。哈,點估到環保署真係「踢一踢先肯郁一郁」,行多步都懶,繼續接受另一個續牌申請,難怪有議員忍唔住大罵環保署「斬腳趾避沙蟲」。
事實上,對比東方此前曝光混凝土廠造成污染一事,今次踢爆環保署做啲唔做啲,更惹居民怒火。本港18區,區區都有一定程度上嘅環境問題,環保署責任重大,首次犯錯尚可當作顧此失彼,屬情有可原,然而知錯不改、一錯再錯,就反映出真正嘅問題根源,似乎出自署方嘅辦事態度。畢竟環保署比任何人都更清楚該間混凝土廠嘅底蘊,當初未向市民開誠布公,已難免令市民生疑,何況分別持有牌照嘅20號廠房同22號廠房不但同屬一公司,且位置緊貼,署方嘅做法彷彿同市民講,一個人右手犯錯,左手依然無辜。
縱然事件屬歷史遺留問題,或者廠方同市民一樣百般無奈,但環保署喺當中角色就截然不同。港府肩負市民期望,施政辦公應當積極主動,急民所急,並且真真正正解決問題,唔係抱住「做個樣畀人睇」嘅官僚態度。特別是當年港府大聲高叫「全城投入,為藍天打氣」,如今功夫茶義正詞嚴,只為沙塵「斷尾」。