功夫茶:凍薪四年未調整 基層勞工真命苦

2021年12月03日 00:03
東網電視
更多新聞短片
俗語話「愈窮愈見鬼」!係香港呢個貧富兩極化社會嘅寫真。嗱,上個月剛發表嘅貧窮情況報告,發覺香港呢個亞洲金融中心,原來4個港人1個窮,身為富裕社會嘅高官,有冇殫精竭慮諗吓計扶貧呢?
有有有!嗰位勞福局局長叫市民買年金應對人口高齡化喎!否則食過百歲就大鑊;呢位「神童局長」唔知米貴,又知唔知基層勞工嘅「最低工資」4年冇加過一毫一分?叫一個無隔宿之糧嘅老人家買年金,同白癡晉惠帝見到老百姓餓到食樹皮,仲笑住問「何不食肉糜」有乜分別?庸官不食人間煙火,梗唔知基層民生多艱也。
各位,最低工資今年初公布首次凍薪,維持每粒鐘37.5元。新一屆最低工資委員會尋日交代自3月上任以來嘅工作回顧,多次被問及下次檢討會否再凍薪。委員會主席就話一切以數據為依歸。乜數據呢又?佢話以2017年上任主席後,最低工資由34.5元上調至37.5元作例,強調委員會冇偏幫勞、資任何一方。屈指一算,即係4年來調整咗3個大洋!講真,基層勞工望調整一次時薪,都真係望穿秋水,想加多一蚊幾角,難過喺石頭榨出鮮血吖!
最低工資委員會主席解釋,即使領取最低工資人數只有約二萬人,但最低工資嘅水平與整個人力資源市場環環相扣。阿姐,人數少唔代表就可以不重視,要知道佢哋多係從事保安、清潔等基層勞工,時薪37.5元4年不變,一日做足8個鐘,一周工作6日,一個月都係搵雞碎咁多;香港居不易,衣食住行樣樣貴,節衣縮食都難捱吖!
呢嗱!有政府經濟顧問就話本港近期經濟唔錯,之不過,經濟復甦唔平均,主要集中喺一、兩個行業,明年商討最低工資前會以前瞻角度觀望,至於以現時趨勢能否預測下次調整,佢認為言之尚早喎!阿哥,基層勞工4年凍薪,眼前物價上漲如斷了線嘅紙鳶,基層已如涸轍之鮒,仲廢噏「前瞻角度」?仲「言之尚早」?係要見到鹹魚先知道一味係咁凍薪會凍死人冇命賠㗎?
事實上,受到黑暴和疫情雙夾擊,經濟不景氣,基層更面對工時減少甚至失業,生活艱難不在話下。樂施會2018年曾發表香港生活工資研究報告,建議生活工資為時薪54.7元,而當時政府訂出最低工資僅為34.5元。嗱,即使後來調到37.5元,兩者仍相差17.2元。喂,4年來都係調整咗3蚊咁大把,依家聽主席及政府經濟顧問嘅聲氣,好似仲想吹冷風凍下去!想調整多17個大洋,比盼望中一次六合彩頭獎更難!