笑看天下:壽則多辱 打針實難-施友朋 評論員

20211206
東網電視
更多新聞短片
新冠疫情肆虐近兩年以來,香港市民因庸官抗疫張弛無道而備受折騰,從一開始喪撲口罩,繼而瘋狂搶購防疫用品如漂白水,甚至搶購廁紙;加上庸官不食人間煙火,「乜原來咁多人要返工」,禁堂食搞到上班一族要冒雨迎風踎街邊、公園甚至喺廁所進食!
呢,本港強制使用「安心出行」出入表列處所,最快於本周四實施,惟政府暫未有公布更多相關豁免詳情。餐飲業界就話早前同食衞局官員就餐飲處所強制使用「安心出行」安排溝通,相信屆時會進一步豁免,除長者外,殘疾人士、有特殊需要人士亦可獲豁免。而更令人關注嘅,就係有關「疫苗護照」嘅安排,預料或於農曆新年後才實施,業界期望可以等到接種率達到八成或以上才實施相關安排。
「疫苗護照」明顯又係要谷長者打針,否則屆時掃「安心出行」都唔可以去飲早茶、睇優惠早場;如果咁谷針都冇成效,庸官未知會否再禁止長者搭公共交通工具?若然,兩蚊乘車優惠都可以取消埋!再唔打針,咁公立醫院「老人科」都唔畀你去。不打針寸步難行,問你仲敢唔敢唔打針?哈哈哈!
老朽都開始有啲動搖,這副硬骨頭還能堅持抗針到幾時?又冇得去茶樓一盅兩件,又冇得去探孫仔,連睇場優惠早場都No way,港人長命,唯一提前領略到嘅就係「壽則多辱」!想做個有點「尊嚴」嘅老人家,唯一方法就係:盡快打針啦!之不過,正當老朽心亂如麻,在打與不打天人交戰之時,睇見全城谷針,出現嚴重副作用嘅賠償機制又唔清唔楚,追討過程隨時一殼眼淚,賠畀你都令你感到恍如「施捨」,何況至今冇一宗死亡個案獲得賠償!打針實難,老朽都係選擇與天地精神相往來!