功夫茶:檢測等足六句鐘 屯門淪陷居民苦

2022年01月13日 00:03
東網電視
更多新聞短片
風中風中,心裏冷風,吹失了夢,未曾檢測就已失控!各位,冷風中候檢瞎折騰,庸官無能懲罰市民。政府縱容國泰航空機組人員毋須隔離而造成防疫大漏洞;屯門爆出「藥房群組」,加上居屯門嘅竹篙灣女保安亦確診,兩周爆出多宗個案,屯門淪疫區,衞生防護中心懷疑該區有隱形傳播鏈,呼籲居民盡快檢測。
不必懷疑,香港市民絕大部分都好守法,政府一呼籲要檢測,尋日屯門區內增設8個流動採樣站,其中位於安定/友愛社區中心嘅採樣站,早上9點就已經有過千人排隊,打晒蛇餅。最早嘅5點多就來排隊,真係「倒塔咁早」!梗係啦,再早一日,即11日星期二大早亦一度有過千人排隊,有居民更喺寒風中輪候6句鐘,阿哥,為誰風露立中宵?都真係等初戀情人都冇咁神心吖!
政府冇吸取教訓,尋日本報記者一早實地到安定/友愛社區中心視察,已見中心內人頭湧湧,人山人海,隊伍以蛇形方式排列,入唔到操場嘅則圍繞着中心外排隊,人龍更延伸至安定邨定康樓後方!朝早屯門氣溫只有攝氏14.7度,記者年輕力壯,都感到現場寒風凜凜,何況整日陰陰天,寒濕是也,難怪輪候人士唔少着上羽絨;然而,唔少人士為長者,佢哋部分要手持拐杖站着苦候,亦有人坐輪椅,更有人自備私家椅等候。長者為檢測求一個安心,無奈備受虐待,場面悲壯,令人不忍!
嗱!輪候等檢測嘅市民各有各吐苦水,有師奶畀人點去元朗,以為嗰度會少啲人,誰知飛的去,原來一樣塞爆截龍,真係「賠了夫人又折兵」!又有市民以為早少少去檢測會冇咁多人,排咗幾粒鐘都未輪到,直言勞氣兼失望,因為未檢測呈陰性返唔到工,搵食艱難,仲要排隊折磨!又有市民表示,自己上月28日經過餐廳而收到通知,但相隔10日先收到通知,直言情況離譜!佢同老婆一大早排隊超過4粒鐘,仲未輪到;佢兩公婆仲可以輪流去吓廁所,佢擔心若有長者一個人排隊,想去如廁又驚一旦離開又會失去位置,都幾麻煩!各位,港人唔單止「幾守法」,仲好有愛心為長者設想添!
呢嗱!政府一面叫屯門市民快啲去做檢測,相對又未能增加足夠檢測地點紓緩人潮;而且,政府要居民多次檢測,但檢測中心嘅網上預約系統只容許每人預約一個時段,並不合理。講真,庸官冇做好分流,令屯門居民一窩蜂湧去排隊食風捱冷,長者冇事都變有病;何況咁多人擠埋一起,不是更易賴嘢嗎?若大吉利是有病毒潛伏者,未檢先中招,真係多得庸官唔少!廢官無能,唔止懲罰屯門居民,仲分分鐘害慘全港市民!