功夫茶:東方藍圖官當草 火燒遊艇停不了

2022年01月16日 00:03
東網電視
更多新聞短片
不聽老人言,吃虧在眼前。呢句嘢未必啱得晒,皆因老人家思想有時跟唔上時代節奏;之但係,不聽東方言,吃虧在眼前,就肯定唔會錯!特區政府高薪養庸官,永遠自以為是,以為自己真係精英,凡事歎杯茶食埋餐飯然後先行紅地氈?阿哥,一見良策,施之就係要快!
功夫茶之所以咁勞氣,皆因見到火燒遊艇、火燒連環船久不久就發生!本港船隻泊位規劃雜亂無章早為人詬病,部分停泊船隻更懷疑非法接駁海底電纜,增加火警風險。嗱嗱嗱,一早聽東方支笛,搞好魚骨形碼頭及泊位,就唔使又見火燒遊艇咁驚險嘅場面啦!
各位,唔係拍戲喎,係真㗎!尋日凌晨時分,觀塘海濱道近海濱公園對開約100米海面,一艘遊艇船尾位置着火燃燒,霎眼間火光熊熊,濃煙席捲半空。多名市民目睹事發,擔心釀成「火燒連環船」,紛紛報警求助。消防船及水警輪接報到場展開救援,至凌晨兩點幾將火救熄,涉事遊艇船尾嚴重焚毀,好彩冇搞出人命咋。
點知觀塘場火呢頭救熄,嗰頭又到西貢出事!尋日下晝,一群男女駕遊艇由龍蝦灣出發往火石洲潛水,未料駛至吊鐘洲以南時遊艇突然起火,火勢一發不可收拾,幸登上救生艇先至執番條命,艘遊艇就燒到變炭石沉大海!
一日發生兩單遊艇火災,都咪話唔邪!針對以上意外,東方大早獻出藍圖,建議喺大埔吐露港海灣設置魚骨形碼頭,並尋覓水域興建整齊有序嘅魚骨形泊位,畀大量船隻停泊,好過依家有十多個避風塘卻無王管而立立亂,甚至打風都冇船肯泊!
有關建議當時獲立法會議員贊同叫好,促請政府注重發展、改善及研究船隻停泊位,可惜政府無能又唔聽東方高人獻計,結果就落得火燒連環船一再發生!大佬吖!你估火燒旺地咩?依家香港衰到貼地,新年開局變死城,團年飯冇着落,年宵市場又收檔,新春煙花更係連續多年取消!
咁講啦,亡羊補牢,猶未遲也。講番個藍圖,為求盡善盡美,東方再進一步作出四大建議:泊位間需有一定距離,以便滅火輪可暢通無阻入火警現場;同時增設消防警報系統,一旦發生火警,系統會自動灑水,並可即時抽取海水救火等;此外,碼頭內設備齊全,有多層會所、商場、停車場及辦公室寫字樓。
一個如此賞心悅目、經世致用嘅藍圖,明明係寶,政府偏偏當草。所謂「得萬人之兵,不如聞一言之當」,庸官施政樣樣阻滯,瓣瓣唔掂,之唔係「不聽東方言,衰氣現眼前」囉!