功夫茶:日防夜防照爆疫 寵物播毒點樣防

20220119
東網電視
更多新聞短片
本港新冠肺炎來如雷霆愈爆愈有,依家除咗出現多宗變種新冠病毒Omicron 個案外,銅鑼灣渣甸街寵物店23歲女店員確診Delta,感染源頭不明,衞生防護中心總監稱,除寵物店有女店員染Delta外,再有一名曾訪該店顧客染疫。
唉,日防夜防疫情照爆,新冠肺炎變種病毒可謂神出鬼沒,你估佢唔到何時出現,而佢一蒲頭,已殺你個措手不及!依家高官又畀外來倉鼠玩殘!當局懷疑有兩種傳播可能,一係售貨員與顧客近距離嘅傳播,即常見嘅人與人之間嘅傳播模式;另一就係調查動物感染嘅原因,不能排除動物會否直接及間接傳人喎!
嗱!由於確診店員喺本月11日出現病徵,中心追蹤其傳染期,指出由今個月7日至15日期間,所有曾與確診售貨員接觸嘅顧客需要接受強檢,涉及約150人。漁護署署長則交代,銅鑼灣寵物店相關動物及大埔倉庫共約2,000隻倉鼠或細小動物將須人道毀滅!仲呼籲市民喺上月22日後買嘅倉鼠需交予漁護署處理。所謂「處理」嘛,即係冇得留低囉!一如有禽流感,全部雞都要死!一有豬瘟,全部豬都要殺!功夫茶見好多記者朋友都有惻隱之心,一直詰問何以要殺晒全部倉鼠?如果發現係人傳倉鼠,倉鼠豈非死得無辜?又有倉鼠關注組擔心出現棄養潮,指政府未搞清楚先令人心惶惶,係帶錯方向!
咁講啦!基於公共衞生及安全計,殺倉鼠行動無可避免!唔通逐隻倉鼠檢疫咩?再講,目前又冇為倉鼠打嘅疫苗針;漁護署又指出,已為銅鑼灣店抽取過百樣本,其中11個倉鼠樣本呈陽性,另外其大埔倉嘅環境樣本亦呈陽性;由於喺天然環境下染疫從未發生過,且該寵物店嘅倉鼠從荷蘭空運進口,但當地冇發生倉鼠染疫情況,故本港個案將屬全球首例。此外,倉鼠互相感染後其排泄物會帶有病毒,難以確保不會傳人,如不盡快人道毀滅,以切斷傳播,漁護署職員照顧佢哋亦有風險!
要言之,全港倉鼠難逃一死!而目前全港所有賣倉鼠店需要停業,倉鼠以外細小動物亦需要測試,直到測試結果滿意才可營業!漁護署早前對野豬大開殺戒,日前大埔黃魚灘一帶即發現多頭野豬感染非洲豬瘟;如今大舉「人道」滅殺全港倉鼠,大家估吓又會唔會出現鼠疫?功夫茶反而擔心,香港人愛心爆棚,常見啲主人對貓狗攬攬錫錫,若然真係寵物傳人,咁就會好大鑊!政府殺完倉鼠,唔通又趕絕貓狗?香港疫情多頭火勢,清零根本係天方夜譚,庸官防疫無能,專家眾聲喧嘩又無厘頭,日防夜防,寵物染疫難防;禁聚令一直禁下去,百業蕭條,基層市民睇怕唔係感染病毒死而係餓死吖前世!