功夫茶:海關破毒如拾芥 差佬悠閒來釣魚

20220518
東網電視
更多新聞短片
毒品害人,影響一生!企硬!唔take嘢!呢啲口號警方往往大力宣傳!之不過,點解屢破毒品案、不論過億元大案或幾十萬蝦毛碎料,幾乎都係海關建奇功?功夫茶真係?晒頭,警方都有緝毒組又有反黑組,照計唔會冇幾耐、扮大袋啩?
嗱!海關今年屢破巨額毒品大案,今個月破獲一個販毒集團,拘捕5名男子,當中3人為集團骨幹成員。海關尋日表示,佢哋喺4月27日透過風險評估,揀選一批由荷蘭經台灣空運到本港嘅鑽孔器(即電鑽)檢查,並於本月6日喺香港國際機場空運站拆箱,喺其中8個箱檢獲200袋透明晶體物品,經檢查後,發現為200公斤俗稱「K仔」嘅氯胺酮,估計市值約8,600萬元。上個月有一單大嘢又係海關建奇功!連破墨西哥抵港貨物「冰」毒案,分別於變壓器及工業用避震膠內,檢獲共700公斤、市值逾4億元,為海關破獲歷來最大宗「冰」毒案。案中海關拘捕兩名本港物流業者,並揭發跨國集團利用大型工業器械藏毒,遙距操控中港兩地物流公司走私毒品。
各位,海關神勇,破毒如拾芥,之但係有一點功夫茶必須特別指出,近排幾單大毒品案,被捕嘅牽涉唔少未成年學生,毛都未出齊竟然出來博大霧、走歪路?究竟背後有冇景轟?呢,今年3月下旬,海關破獲市值1.1億元嘅120公斤懷疑可卡因,拘捕兩名14歲及15歲未成年學生及一名物流公司女職員,指佢哋涉嫌透過物流公司以海運方式,從中美洲哥斯達黎加販運毒品到港,相信背後有黑社會操控,並將毒品供應本地市場。
呢,早前喺粉嶺打鼓嶺坪輋路搗破毒品庫,拘捕一對年輕小情侶,揭發兩人為「搵快錢」,由毒販出資租屋作毒品倉庫,行動中檢獲市值約2,300萬元嘅冰毒、海洛英及K仔。海關指出,近年21歲以下人士涉及販毒而被海關拘捕嘅有上升趨勢,由2020年嘅34人上升到2021年嘅50人。咁多青少年誤入歧途,好明顯背後有大毒梟操控,被捕年輕人慘成替死鬼,一生前途盡毀,而幕後黑手卻逍遙法外!日月昭昭,天理不容吖!
講真,海關雖然屢破大毒案,要將啲幕後黑手、大毒梟繩之以法,確實需要警方、律政司勇於深入發掘探討,上窮碧落下黃泉去追蹤,尤其係警方,咁多人力物力、情報網、線人等,守城帶勇之人,唔好悶到發慌熄埋CCTV只顧釣魚至得㗎!你哋又唔係釣到俗稱「冇啦冇啦」嘅翻車魚!好心做番齣好戲,唔好畀人睇到幕後大毒梟壞事做盡卻逍遙法外,令人深感佢哋有保護傘,法治之區有警黑勾結,試問成何體統?功夫茶盼望武官治港,把背後荼毒青少年嘅販毒黑手一網成擒並重判以儆效尤,為特區政府真正開新篇!