功夫茶:發泡膠箱惹火患 政府屢勸屢不改

2022年05月19日 00:04
東網電視
更多新聞短片
又係發泡膠箱圍城惹火患,阿哥,功夫茶講過多次喇!又講?講來講去三幅被,量來量去二丈四!喂吖,火燒豬頭,熟口熟面,畀啲新意好冇?各位,實情係發泡膠箱圍城自今年2月初至今已足足3個多月,至今仍然未解決,好礙眼啫!
疫慌下,內地一早通知香港,禁止循環使用曾運往香港嘅發泡膠箱,又暫停跨境貨車運載發泡膠箱到內地回收廠,18區嘅街市每日都有蔬果供應,可以想像只要一日冇回收,已經可以堆成山或發泡膠長城!呢,有議員尋日喺立法會會議上批評政府部門各自為政,形容當局只呆等內地接收發泡膠箱,令市民對環保政策失望。
講真,何止失望,簡直絕望!咁耐都搞唔掂啲亂疊如山嘅發泡膠箱,一來惹火,二來惹鼠患。當局回應指每日有12萬個供港發泡膠箱,合共48公噸。之不過清理只有三至四成,每日清理約4至5萬個發泡膠箱,日積月累,有乜辦法唔發泡膠箱圍城吖?
各位,發泡膠屬「惹火尤物」,火勢蔓延極快,並會產生有毒嘅苯乙烯氣體,造成眼睛刺痛及呼吸困難等,化學專家甚至指出,燃燒期間亦會釋出一氧化碳,不慎吸入隨時暈倒,可見呢啲「惹火尤物」確實不應堆到周圍都係,隨時惹火焚城!嗱!上個月6日,深水埗一天橋底位置堆積大量發泡膠箱等雜物而起火,火勢猛烈,濃煙席捲半空,消防到場將火迅速救熄,惟行車天橋底亦嚴重熏黑!此外,3月10日,葵涌7號貨櫃碼頭又係因有一大批堆放路邊嘅發泡膠箱起火,火勢猛烈,大量濃煙沖上半空,調查相信有人不慎留下未熄煙蒂所致。呢,若然起火嘅發泡膠箱接近民居,市民吸入濃煙分分鐘出事!
再講,本港鼠患嚴重,大量發泡膠箱堆疊,因其內往往有剩餘蔬果或食物殘餘,容易吸引老鼠光顧傳播細菌!本月13日衞生防護中心表示,正調查一宗人類感染大鼠戊型肝炎個案,涉及一名居於大埔圍頭村、有長期病患55歲男子,屬今年首宗個案。疫慌持續,鼠疫又來,仲唔扭盡六壬清理啲發泡膠箱,一味指天篤地話會加緊跨部門協作,以解決回收問題;之但係各部門之間又不協調,好似食環署發言人曾表示,公眾地方擺放雜物,譬如堆積嘅發泡膠箱屬街道管理問題,經常需要多個政府部門協調下採取聯合行動處理云云。喂,搞堆發泡膠箱乜好似調兵遣將打第三次世界大戰咁款!
呢嗱,廢官仲死剩把口,指發泡膠箱有市有價,希望可運往內地重用。阿哥,依家通關遙遙無期,發泡膠箱又回收無方,連添置發泡膠壓縮機都藉口多多,又話驚日後情況改善,機器就變廢物,要平衡呢方面工作喎!再廢噏得嚟,火燒眼眉啦!