功夫茶:元朗驚見毒狗案 野蠻城市真羞家

2022年05月22日 00:03
東網電視
更多新聞短片
香港表面係一個文明都市,不是嗎?既有「漁護署」及「愛護動物協會」;警方2018年喺22個警區設立專責刑事隊負責處理虐畜案件,並於2021年命名為「動物罪案警察專隊」。威啩?之不過,虐待動物喺香港可謂層出不窮,令人慘不忍睹!
各位,尋日元朗又發生懷疑毒狗案!元朗一村屋28歲姓黃住戶,一大早赫見村屋前園地上血漬斑斑,其飼養嘅黑色唐狗倒臥地上已全無氣息,齜牙咧嘴口吐血,疑曾痛苦掙扎。飼主驚見愛犬暴斃,懷疑有歹毒之徒向其投毒,於是報警求助。警方到場視察了解,初步將案列作「殘酷對待動物」,交元朗警區刑事調查隊跟進。
動物嘅命也是命,尊重生命係應有之義,更何況狗狗係人類最忠誠嘅朋友。嗱!功夫茶希望警方必定要上窮碧落下黃泉,要認真去搜尋每個可能嘅線索,將冷血兇徒繩之於法!等啲狂徒咪以為虐殺毛孩又唔係殺人,警方未必落力去搜尋個水落石出!
嗱!有陣時又好難怪啲狂徒有咁嘅諗法。各位,港大法律學院與愛協曾進行研究,審視愛協2013至2019年數據庫中335宗涉嫌虐待動物案件,發現當中逾170宗案件未進行檢控;主因係警方無法找到犯人,或喺檢查時無法發現身體受傷嘅證據。虐待動物破案率咁低,無疑對兇徒起了激勵作用,以為毒狗甚至殘殺整煲香肉歎吓亦好小事啫!
事實上,虐待動物嘅判刑亦太輕,有些僅判百多小時社會服務令和罰款,根本起不了阻嚇作用。呢,即使2019年就《防止殘酷對待動物條例》完成諮詢,亦加入「謹慎責任」嘅概念,之但係,政府又係唔嗲唔吊,修例草案千呼萬喚終於預計今年下半年提交立法會討論。阿哥,拖到今時今日,依然認為目前建議修訂仍有不足及漏洞,如執法部門難以規管違法放生情況等。
唉!香港一年到晚都發生咁多虐待動物事件,講真,距離「文明城市」已愈來愈遠。印度聖雄甘地有名言:一個國家的偉大和道德進步程度,可以視其對待動物的方式來判斷。功夫茶之前深感有人一次過擲30隻寵物落街,認為若真為動物設想,要防患未然,喺香港養寵物應要考牌。要言之,即係要睇吓養者是否真有愛心及環境,唔通住劏房又養咩?另外,就係要考核心理質素,譬如話是否貪一時過癮。講到呢處,功夫茶又要指出本報早前提出「貓狗善終園」藍圖,由政府搵地為流浪貓狗絕育並提供生養死葬一條龍服務,這藍圖得到唔少立法會議員及有識之士欣賞,可惜冇靈魂政府連咁有見地及愛心嘅藍圖都唔肯去做,香港有乜辦法唔變令人蒙羞嘅野蠻城市吖!