笑看天下:唔驚中招只驚死於焦慮-施友朋 評論員

20220526
東網電視
更多新聞短片
現屆政府任期僅剩一個多月,正係「時日無多」,老朽浮起古人說的「舟覆乃見善游,馬奔乃見良御」。冇錯,船隻翻覆,就會出現善於游泳嘅人;馬匹奔馳,就會出現善於駕馭嘅人!本屆政府落雨收柴,各位市民,心目中可有「善泳」或「良御」嘅官員?相信現屆政府一眾問責高官,能予市民良好觀感嘅不多,更遑論德才兼備、勇於為人民服務嘅父母官。
正如本報指出,本屆政府抗疫不力兼通關無望,民心早已盡失。庸官抗疫寬嚴無度,更加係堅離地,第5波疫情完全見到庸官抗疫無能,累計死亡人數逾9,000人,死者大半為年老體弱嘅院舍老人,抗疫失策,一眾庸官難辭其咎!
最新民調顯示,對政府感到不滿意嘅受訪市民接近六成,對政府表示不信任嘅則超過四成。事實上,抗疫政策朝令夕改,專家出嚟講嘢不單止眾聲喧嘩,而且各自表述,五時花六時變!港人都算忠厚,咁嘅惡劣環境,對政府嘅不信任度都未過半,可見港人的確「宅心仁厚」!唔少市民疫慌下冇啖好食,食衞局局長陳肇始曾實施「全日禁堂食」,搞到基層雨天跪地食飯有之,地盤工友塵埃送飯有之,民怨沸騰,廢官先知「乜原來咁多人要返工㗎」!民生如此多艱,歷盡厄困,對政府不滿意度仍然只有接近六成,可見香港不乏順民!
此外,社會十項幸福指標,大部分均錄得下跌。老朽不必多講,單係早上外出一趟吃個早餐,再去街市買條菜,已要掃「安心出行」及「疫苗通行證」掃到手抽筋;仲有呀,政府有理冇理係咁谷人打針,對一些不適宜打針嘅市民全不通融,係都要逼人打第3針、第4針、第N針,阿哥,老朽唔係驚中招,係驚死於焦慮,仲講乜幸福吖!