笑看天下:烏啄啄亂成一團糟-施友朋 評論員

2022年05月27日 00:04
東網電視
更多新聞短片
世界太亂了,美國槍擊案如家常便飯;香港駭人聽聞嘅虐兒案,卻如下午茶,亦平常得很。呢,早前本報獨家率先揭發嘅「童樂居」虐兒事件,日前喺立法會上,有議員提出「正視本港虐兒問題」議案,批評現時本港整個保護兒童鏈均出現問題。確實係,「童樂居」變「童虐居」,事件亦反映政府監管不力,令人髮指!
有議員引用警方資料,指2021年首3季警方共接獲871宗虐兒嘅刑事案件,較2020年同期增加66%。老朽對「童樂居」虐兒案發生喺香港呢個「文明社會」、「法治之區」完全不敢相信,一個受資助保護兒童嘅機構,竟養咗一大班變態嘅「幼兒工作者」,而佢哋仲話受過專業訓練,而有關虐兒事件發生咗咁耐,社署竟然長期「如在夢中」,可見整個監察系統及機制形同虛設!有關事件分明有人玩忽職守,點解唔使問責下台?呢啲情況發生在歐美任何國家,負責嘅部門首長肯定晨早鞠躬道歉下台!
有人關注現行嘅兒童住宿照顧服務工作是否足夠?勞福局表示,社署現有23名人員負責預約或突擊探訪及巡查等工作,包括按情況翻看閉路電視片段以跟進調查;另外現時所有留宿幼兒中心已完成安裝閉路電視系統,並按新制訂嘅政策及機制翻看紀錄。預期將於今年9月完成第一階段有關留宿幼兒中心服務嘅檢討,明年3月完成第二階段有關其他與照顧兒童相關服務嘅檢討。換言之,一切補鑊都係新政府嘅事!其實,「天眼」一向存在,「童樂居」有晒閉路電視監察,問題係冇人去跟進,有天眼等如冇天眼,即係有法冇人執行,所謂「法治」得啖笑!今有齊天眼,記得要依時跟進,否則就如食環治鼠,連放藥餌都冇開封,烏龍成咁,香港有乜辦法唔烏啄啄亂成一團糟啊!