功夫茶:管治無能奏離歌 人心浮動移民多

2022年05月28日 00:03
東網電視
更多新聞短片
木棉花開透,寒風快快走!依家卻不是寒風快快走,而係唔少港人趕住出走,移民他國去也!「香港幾好都有,點捨得走」已然變調;功夫茶想起九七前曾掀起一輪波瀾壯闊嘅移民潮,猶幸九七後「馬照跑,舞照跳,股照炒」再度吸引港人回流!之不過,回歸即將25年,何以民心又浮動,咁多人爭住移民?
要離開一個自己熟悉嘅地方,可以有千百個理由,之不過,若然一家大小連埋寵物都帶走,咁大決心,必然係「哀莫大於心死」!回歸即將25年,「一國兩制」有否行穩致遠?《港區國安法》是否令港人感到更宜居?為何有前高官都話「為咗下一代」要舉家移民英國,乜香港啲教育真係好唔掂咩?喂,阿哥,一個政府民生經濟政策要廢到乜程度,市民先會有錢、冇錢都諗住要遠走高飛做二等公民?
呢嗱!疫慌持續,惟機場人流絡繹不絕,離港人士居高不下。政府雖死撐未必係「人才流失」,只係正常「流動」,又阿Q精神認為疫情過後人才自會上升。阿哥,睇唔到最近IT界正面臨前所未有嘅人手荒嗎?移民潮愈演愈烈,已是不爭嘅事實。最近唔少港人利用BNO簽證申請英國政府推出嘅「5+1」居留方案。有外媒報道,英國政府於今年首季收到19,500宗BNO簽證嘅申請,與去年第4季約15,600宗比較,按季增25%,都咪話唔誇張!
各位,去年首季嘅BNO簽證申請高達34,300宗,隨後持續回落;但係唔好忘記,去年累計相關申請達104,500宗。自《港區國安法》頒布實施,英國修改咗BNO簽證政策文件,合資格嘅香港居民可以申請BNO簽證移民英國,且移居後只需居英滿5年後便可申請永久居留權,而於獲永久居留權身份一年後,就可申請正式入籍為英國公民。
事實上,除咗英國修改BNO簽證政策,其他國家如加拿大、澳洲等地都窺準港人移民意欲盛,紛紛降低移民門檻爭搶香港人才和資金,港府若然不肯正視問題所在,尤其係管治無能下找出根源,像第5波疫情何以死得人多?何以假難民、黑幫毒瘤咁多年來依然未能除去,甚且予人養癰遺患之感?回歸後司法不公不正,律政司又偏又倚,包庇反中亂港之徒等,這都需要切實檢討,再以猛藥去疴!絕不能拖泥帶水。
至於抗疫逾兩年,庸官防疫政策朝令夕改,害慘市民;社交距離寬緊無度,隔離措施、航空熔斷機制更是嚇怕外資,紛紛話要遠離香港投向星洲懷抱!新政府即將上台,功夫茶都希望香港坎坷過後有艇搭。武官治港,究竟能為香港重拾往日嘅光輝歲月,還是「一拳打出眼火,對面睇見牙煙」?看來,還有待未來日子證明!