功夫茶:珍寶拖走變永別 深葬海底益龍王

2022年06月23日 00:03
東網電視
更多新聞短片
臨近7‧1慶回歸25周年,好消息唔多覺,反而衰嘢接踵而至,日前中電有電䌫橋爆炸起火,搞到新界西大停電!而上周六,承載港人無數快樂回憶嘅珍寶海鮮舫被拖至南海西沙群島附近水域,話遇到風浪致船身入水而傾側,最終沉沒喺逾一千米深海底!
各位,有評論認為臨回歸大日子又爆炸又沉船,會否有多少唔老利呢?就林鄭「好打得」性格而觀之,佢點兜都話自己為香港交出亮麗成績表;一艘睇唔到前景、送畀海洋公園都唔吼嘅珍寶海鮮舫,依家葬身南海,咪當「沉舟側畔千帆過,病樹前頭萬木春」囉!反正港人善忘,好快就會忘記!冇咗珍寶,最緊要有六合彩金多寶8,000萬吖!
新班子要開新風,都係要向前看!之不過,珍寶海鮮舫「怒沉」西沙群島引來唔少熱議及質疑,甚至涉及「陰謀論」。呢,擁有珍寶海鮮舫嘅香港仔飲食集團表示正就事件了解。但據當日發出嘅聲明,珍寶海鮮舫喺西沙群島附近沉沒;海事處日前證實佢離港出發前往柬埔寨,但船東公布沉沒前未接到通知,珍寶海鮮舫究竟拖去邊?路徑諱莫如深,引起各方猜測,海事處已要求提交書面報告並會跟進調查云云。
對珍寶海鮮舫深葬海底,眾聲喧嘩,除了令港人震驚,亦頗多質疑。呢,有認為隻船沉沒並非話沉就沉,起碼要經過一段時間入水先傾斜,再「醞釀」沉沒,何以冇任何照片、錄影?冇圖冇真相,依家任你噏乜都得喇!況且,珍寶海鮮舫本身係一艘躉船,冇自我推動能力,為何非要拖佢去公海?去咁遠而為何不用「半潛船」方式運送?半潛船指作業時,船體絕大部分可以潛入水下,而航行時處於正常吃水狀態嘅一種特種船舶。要言之,就係一款能夠運送超大型貨物嘅船隻,以保證運輸嘅安全性和穩定性;依家又冇評估運送安全風險,求其搵艘拖船梗係賴嘢啦!
此外,最引人關注嘅係天氣問題,皆因從各地天文台嘅數據顯示,當時風力輕微,只有二級微風,平均風速為每小時7至12公里,遠未達3號波嘅六級風力;既然「水波不興」,一個體重百多磅嘅人都未必吹得郁,何以咁大隻珍寶海鮮舫不堪一吹?咁易就被吹到傾斜?難怪有旅遊業界人士覺得事件耐人尋味,有議員就覺得匪夷所思,有網民認為珍寶蝕到入肉,保養維修亦要一大筆,棄之不足惜!如今葬身深海,益吓海龍王做壽擺酒有個雕龍雕鳳嘅大堂,都算做咗件好事!又有論者指珍寶死於新冠肺炎!皆因庸官抗疫張弛無度,尤其與外國通關無望,珍寶海鮮舫又專做高端遊客生意,係佢哋嘅打卡景點,依家呢類遊客絕迹,夕陽西下,海上只餘幾隻海鷗低迴呱呱叫,家陣珍寶長眠海底,或許可以聽見龍王滄海一聲笑,說不定別有一番滋味在心頭!