功夫茶:人心不古虐兒多 禮崩樂壞出淫師

2022年06月24日 00:04
東網電視
更多新聞短片
世衰道微,人心不古,自不然道德廢,功業薄。我哋感嘆依家啲人,失去古人嗰種忠厚淳樸。明明從事幼兒工作,本應對幼兒有愛心,點知卻視幼兒為仇讎,虐之而後快!而作為老師嘅卻藉學生對佢嘅信任發展不倫之戀,專業失德,枉為人師!功夫茶只能說,一個人心不古、禮崩樂壞嘅社會,只會產生大量無恥之徒!
呢!本報早前率先獨家報道香港保護兒童會轄下嘅「童樂居」員工涉嫌虐待,繼27名女職員被落案起訴後,再多7名女職員被控並於尋日出庭應訊。7人被控合共14項對所看管兒童或少年人虐待或忽略,連同17名將轉介至區院處理嘅被告,尋日一併喺九龍城裁判法院提堂。全部被告暫毋須答辯,24人之中,3人將於7月12日到區院答辯,其餘21人則押後至9月16日再訊,以待控方準備轉介往區院文件,期間24人續准保釋。
以上多人均有新增控罪,有面對多達15項對所看管兒童或少年人虐待或忽略罪。由於案件仍在審訊中,功夫茶不便多談;之不過,一名46歲女被告香詠珊,被指扯兩歲男童嘅頭髮以及推男童嘅頭撞牆,佢早前承認虐兒。感化官喺報告指被告非有意傷害該男童,認為被告僅僅適合判社會服務令。裁判官則指被告嘅悔意及反省令人懷疑,強調法庭須向兒童工作者發出明確訊息,忽略及虐兒會招來嚴重後果,認為社會服務令非合適判刑,日前判女被告入獄4個月。
天道昭昭,判監4個月而非判社會服務令,不算太過吧?女被告自1996年已開始從事照顧兒童工作,並有上過相關課程,而竟然不停做出虐兒行為,如果咁都可以判社會服務令,確係天理不容!各位,警方檢取咗相關嘅閉路電視片段後,一路睇一路揭發受虐兒童愈來愈多,而被捕嘅職員也愈來愈多!事件亦反映有關當局如勞福局、社會福利署長期欠監管,令「童樂居」變「童虐居」!本屆政府落台在即,可惜有關高官連一個道歉都冇,反而一味往自己臉上貼金,做官做到咁無恥,你話係唔係人心不古吖?
至於禮崩樂壞,有單中學英文教師與15歲女學生發展不倫關係,期間向女生摸胸接吻、赤裸磨蹭,更涉與女生進行無套性交!淫師涉「衰十一」與未成年少女發生性行為!佢否認7項控罪,惟經審訊後被裁定全部罪成,尋日喺區院判囚3年9個月。法官指被告喺求情信中冇隻字提及事主,只話因案件不能再執教鞭而付出沉重代價;法官亦指從報告中可見受害女生「人生某程度摧毀咗」,而被告對女生冇一句悔咎,遑論自責?國學大師季羨林生前曾感嘆:壞人是不知道自己係壞人,因此壞人不可能變好!淫師就係淫師,披着羊皮都係一隻色狼!「衰十一」唔判佢「化學閹割」已係便宜咗佢,仲話冇得執教鞭係付出沉重代價,人性之醜陋、人心之叵測竟有如此者!