笑看天下:官場遇知己 破涕為笑-施友朋 評論員

2022年06月24日 00:04
東網電視
更多新聞短片
快將卸任嘅食衞局局長陳肇始,日前最後一次以官員身份出席立法會,會後佢主動見記者,言談間連番哽咽,泫然欲泣,本報「政情」版話佢「喊包上身」!幸好唔係話佢「孟姜女上身」,否則哭崩立法會就大劑!喂!你任內防疫抗疫一塌糊塗,政策朝令夕改,咁都唔使問責下台,個個月袋30多萬元人工,如今拍拍屁股走人,又攞足幾百萬元約滿酬金,仲喊乜鬼呢?
嗱!縱橫影視60多年嘅大導演楚原,回首半生,就話人生如打麻雀,有東南西北風,打到北風時,又係另一個人生……當你回首往事,不因碌碌無為而悔恨,不為虛度年華而羞恥,你便能很驕傲地說,你無負此生!
依家打到北風,冇得留低,陳肇始顯然不覺得自己碌碌無為而悔恨,佢被記者問到是否抗疫不力,以及會唔會向9,000多名疫下嘅死者道歉,佢就不予回應,轉身走人,可見佢泫然欲泣,並不是感到自己德薄而位尊,智小而謀大,力小而任重!假假哋都可以坐足5年問責高官,冇中途被撤換,其實好應該驕傲地說:我無負此生!
各位,咁陳肇始連番哽咽所為何事?原來「巾幗有淚不輕彈,只是未到傷心處」!一講到自己服務政府10年,要多謝特首林鄭對佢嘅信任同支持喎!於是鼻子一酸,感觸抽噎,眼泛淚光!這是有感「知遇之恩」,是世有伯樂而後有千里馬的悲喜交集?市民唔識寶,獨林鄭具慧眼唔當自己係草,臨別涕泣,不是很正常嗎?「可以笑的話不會哭,可找到知己哪會孤獨」?可以盡訴心中情不會退縮,一如賞識她的林鄭也不會向市民道歉,而要向自己老公囝囝道歉!古人論交友之道:人生得一知己死而無憾!陳肇始於官場幸遇之,仲唔破涕為笑?