功夫茶:醫護荒愈演愈烈 引外援勿再拖延

20220625
東網電視
更多新聞短片
香港公營醫療醫生人手長期嚴重短缺,這已不是甚麼新聞。事實上,有檢討報告推算本港醫生短缺問題最少持續至2030年,屆時全港將欠缺超過1,000名醫生。現實係,本港人口不斷老化,對醫療需求亦在不斷擴大,未來缺口可能更大,一個有為嘅政府理應想方設法解決醫護短缺問題,若一再拖延,受苦嘅只會係廣大市民,尤其係基層和長者。呢!醫管局對醫護人手流失嚴重表示憂慮,截至今年4月,指過去一年全職醫生流失率高達7.9%,即約500人,而全職護士流失更高達約2,600人。
本港長期醫生荒,原因多方面,近期由於移民潮,無疑又流失一批醫護,令緊絀嘅人手更雪上加霜。嗱!雖然立法會去年已通過修例,引入海外醫生以紓緩公院醫生人手荒,之不過進展緩慢,原定5月舉行嘅海外醫生執業資格試臨床試,醫委會宣布取消,話基於疫情嚴峻考慮云云,不過被質疑何以本港兩所大學嘅醫學院仍順利舉行畢業試,而海外醫生執業試就連番告吹,究竟醫委會嘅決定,係出於疫情嘅考慮,抑或基於保護本地醫生嘅利益呢?有議員直指取消執業試係「玩嘢」,批評咁只會惡化醫生短缺問題,仲叫政府同醫委會唔好攞市民生命嚟較飛!
嗱!都說「醫者父母心」,有句對醫生充滿使命感嘅宣言「視病猶親」,假設醫生都能幻想躺在病床上嘅係自己家人,就唔會以保護本地醫生嘅利益為前提,而坐視病人排專科過長而等到死都未做到手術,有患低血壓嘅婆婆甚至淒然話,排期時間過長,可能冇下一次見面!各位,醫委會諸公如果視病猶親,以病人利益為依歸,理應痌瘝在抱,去除成見,全面支持引入合資格海外醫生喇!
醫管局眼見醫護人手不足已去到臨界點,推出一連串挽留員工政策,早前宣布延長退休年齡至65歲,據云初見成效,已有數百員工延遲退休;此外,又通過低息置業貸款計劃,員工只要工作滿3年,便可申請。之不過,講乜計劃都係其次,最緊要係快啲引入外援醫生,人命關天,切勿再拖!醫管局計劃引入大灣區等外地醫生,以「有限度註冊」方式來港服務及交流,首批有望引入5至10人在港服務。
講真,得嗰幾丁真係炒埋唔夠半碟,予人杯水車薪、姿勢大於實際之觀感!家陣醫生荒嚴峻,引入外援乃當務之急,功夫茶建議引入馬來西亞醫生。馬來西亞喺全球最佳醫療國家排名中,經常名列榜首。當地有30多所醫科大學,每400個馬來西亞人中就有一個醫生,醫生數量龐大,且專業要求極高,當地執業醫生普遍畢業或進修於英、美、澳等醫療發達國家;佢哋嘅英語水平,比起引入大灣區醫生嘅英文水平要估估吓來得實際。救急扶危,刻不容緩,醫管局不妨認真考慮吓!