功夫茶:口說有計實無招 炒場歪風遏不止

2022年06月26日 00:03
東網電視
更多新聞短片
香港人炒樓炒金炒股係常態,最近因暑假將至,指定檢疫酒店「一房難求」,疑似出現「炒房」,食衞局又推3招遏止炒賣檢疫房間;當然,講到炒得最勁嘅,莫過於某人氣男團喺紅館嘅演唱會飛,「黃牛癲價」可以炒到幾萬蚊一張,姑勿論真定假,所謂「實名制」賣飛似乎仲未見成效喎!
呢,康文署嘅康樂設施場地都畀人「炒場」,佢哋就話有新招遏止歪風!自以為兜着屁股吊頸就安全,其實又係廢!康文署早喺5月宣布推出3招打擊炒場,分別係網上預訂、自助服務站早15分鐘開放預訂;禁止團體申請者轉換活動負責人,以及容許租用人用「智方便」訂場。首兩招旨在打擊排隊黨和轉讓場次,第3招加強實名制功能,可惜仍未能助市民擺脫炒場集團加強運用電腦程式搶租。
各位,康文署將於下月1日舉辦「回歸25周年——免費玩盡康樂設施」!聽個名就勁咯!大部分設施可以免費任玩,認真係濕水棉花,冇得彈!今趟發達喇!康文署轄下設施,包括室內及室外康樂設施,好似羽毛球場、籃球場、高爾夫球設施等,亦包括公眾游泳池全部免費開放。不過,市民向本報求助指,相關政策令不少黃牛黨趁機無本生利,令「炒場之風」更為熾熱。咁,康文署豈不是好心做壞事?
市民發覺,康文署官網大早顯示大部分場地已被租訂,但有人卻於網上買賣平台隨意放售,以兩小時約300港元嘅籃球場原價為例,網上標價至550港元起,如黃金時段更動輒800至1,200港元,嘩,即係炒高成四倍!批評康文署無力遏止炒場情況,即係署方根本冇辦法確保網上訂場者係真正需要運動嘅市民!署方口說有計實無招!阿哥,依家唔係武俠小說裏面啲高人學劍,所謂「無招勝有招」,係搞到真正用家想訂場地而苦無門路,谷住一肚火,好想請啲官老爺食蕉吖!
市民身受「炒場」之苦,佢話「智方便」訂場除咗身份認證,亦要綁定一個電話等,之但係相關方法有唔少漏洞,佢直言見過唔少黃牛黨借用年長嘅家人身份租場,再現場放售;為避免職員抽查,更會叫老人家直接喺現場留守!道高一尺,魔高一丈。自新措施落實,黃牛黨只係轉換咗手法,退休長者成為佢哋招募對象,是以建議署方應以「放蛇」取代巡查,只要成功堵截有人買賣場地,應予以重罰。
康文署為遏止炒場,雖然一再出招,可惜招招無力,都淪為銀樣鑞槍頭!治亂世用重典乃不易之至理,遏炒場歪風亦然!康文署看來要學《水滸傳》中力大無窮嘅李逵,舞一對玄鐵板斧,能夠殺一窩四虎!如此,黃牛黨能不聞風喪膽?