笑看天下:三疫三災唔通有啟示-施友朋 評論員

20220627
東網電視
更多新聞短片
好事多磨?內地官媒日前公布國家主席習近平將出席香港回歸25周年大會暨香港特別行政區第6屆政府就職典禮,老朽亦指這充分顯示習近平對香港嘅關心、看重,以及心繫香港同胞利益福祉。
之不過,官媒冇提及習近平會否親身赴港及列明來港日期。據悉,因應新冠疫情關係,尤其係未來幾日嘅變化,具體以甚麼形式參與,有待中央和特區政府安排。目前眾說紛紜,都不敢肯定,而多數都認為,若疫情冇大變化,習近平最終會親自來港,頂多如候任行會召集人葉劉淑儀估計,因應疫情,行程不會像2017年般豐富,除咗出席回歸慶典和新政府就職禮,亦到訪西九文化區、去石崗軍營閱兵、視察港珠澳大橋等,今趟就算蒞臨,大有可能即日來回,當然詳情仍有待官方公布。
事實上,本港疫情持續蔓延,尤其是食肆群組爆疫,疑擴大至安老院舍。事緣爆發BA.2.12.1嘅屯門海港酒家日前增加3名染疫食客,累計36名食客及4名密切接觸者染疫,包括兩名屯門富泰護理安老院職員。有關安老院舍已增至10名院友及5名職員染疫,衞生防護中心須進一步調查。呢單嘢睇怕幾難搞,若再來院舍爆疫,都真係好大鑊!
本報為特區發預警:「黎明前黑暗時代」,特別指出三疫三災迎特區25載!三疫指新冠、鼠患、猴痘,三災指大停電、珍寶海鮮舫將沉沒、佐敦危樓!呢啲疫情災難,無不令港人揪心!呢,特區政府換屆在即,即使無祥雲瑞光,都唔好又風又雨又疫災吖!
新一屆政府將登場,各界無不期許香港換新天現新貌!唔通天將降大任於新班子,「前人種樹,後人乘涼」冇份,而係必先苦其心志、勞其筋骨乎?