笑看天下:盡快通關保持競爭力-施友朋 評論員

2022年06月29日 00:05
東網電視
更多新聞短片
香港疫情持續,每日維持逾千宗甚至接近二千宗,之不過,歷經兩年多嘅抗疫,中招人數以百萬計,而第3階段「疫苗通行證」亦已於5月31日起實施,未打齊3針嘅幾乎邊度都唔使去,是以相信應該有唔少人已補打了!
事實上,大多數市民對疫情持續並不太慌張,老朽見食肆、茶樓人流都幾旺,並冇被「屯門海港酒家群組」嚇窒。日子要正常過,已做足要做嘅防範工夫,真係中招,頂多在家自我隔離,沒有甚麼大不了!日前政府宣布,社交距離措施將延續多14日至下月13日,以防疫情反彈,當中包括繼續要求市民快速檢測無事才能到酒吧飲酒,老朽嫌麻煩已謝絕一切酒吧約會。
政府就話污水監察數據亦顯示各區病毒量有所上升;雖然入院人數有所增加,但目前仍維持較低水平,重症或死亡個案亦未有明顯上升迹象。政府會繼續密切監察整體疫情發展,並採取防控措施以繼續降低疫情反彈嘅風險。
嗱!政府謹慎,社交距離放寬看來仍然無期,當局依然一再呼籲市民盡快完成接種3劑疫苗,並要合資格長者快打第4劑疫苗。政府全方位「谷針」,點都會有些成效。之不過,短期內即使未能同內地通關,香港作為國際金融中心,被指通關安排較紐約、倫敦、新加坡等更為嚴苛,引發商界關注近期唔少人才和資金流出。有銀行家亦認為,香港作為連接內地與海外市場嘅窗口,國際金融中心嘅競爭優勢非常明顯,未來十多年,香港嘅角色仲有排發揮,是以本港必須盡快與世界不同金融中心標準接軌,唔希望見到香港競爭力輸蝕!這也正是本報一直指出要縮短酒店檢疫日數,甚至容許本港居民出國旅行後回港可居家隔離嘅主因。