功夫茶:來港工作貴夾煩 再唔鬆綁更趕客

20220630
東網電視
更多新聞短片
「一燕不成夏」呢個詞語係叫人凡事不要憑個別現象草率下判斷;之但係「香港不易居」或「香港居不易」卻不需估估吓,活在香港,衣食住行樣樣貴,人工永遠追唔上物價,打工仔活得辛苦,不必匆忙判斷,已係共識!
呢嗱,有調查有比較就有真相。有國際諮詢公司公布一年一度嘅外派人員生活費調查,主要通過比較400多個城市嘅200種商品,以及產品嘅價格來作出排名。結果,香港係全球外派人員生活成本最高嘅地方。200多項嘅成本比較,包括住房、交通、食品、服裝、日用品和娛樂,涵蓋範圍都算全面。
香港再膺全球外派人員生活費最貴城市,一點也不令人意外。分析師指,過去一年港元與美元掛鈎而保持強勢;即使樓價略有下調,依然貴到飛起,就算「納米樓」亦非一般打工仔可以負擔!結果香港5年來第4次被評為海外工作成本最高嘅地區。緊隨香港嘅係蘇黎世、日內瓦、巴塞爾和伯爾尼呢4個瑞士城市,佔據第2到第5嘅位置。
至於排名首10位嘅仲有3個亞洲城市,分別係新加坡、東京和北京,分別名列第8、第9和第10。中國內地有4個城市進入咗首20名,除北京外,還有上海、深圳、廣州。許多亞洲城市嘅排名高,主要因為通脹和貨幣轉強。反之,由於貨幣貶值,日本和南韓嘅一些城市,生活成本相對便宜,排名自是有所下降。嗱,生活成本上升大有可能令外國公司嘅外派人員裹足不前;正如有論者稱,香港持續嘅嚴苛防疫措施,加上談不上穩定嘅時局,既然派駐員工去香港嘅成本變得昂貴,為何不去其他東南亞地區尋覓商機?
事實上,撇除外派人員生活費樣樣貴,最令外商卻步嘅,無疑係過嚴嘅防疫措施,諸多設限,相對日本、南韓、新加坡、泰國等亞洲地區早已開放門禁,有些甚至不用打針也不需隔離也能入境。呢嗱,內地即使清零方針不變,中國疾控中心亦有研究員指出,Omicron 病毒株平均潛伏期減至2至4日,絕大部分可7日內檢出,防疫方案應作出調整優化,放寬入境隔離規定,縮至7日隔離加3日居家監察,消息公布一小時,據云機票預訂霎時勁升六成!本報「正論」高瞻遠矚,多次疾呼,當全世界早已恢復正常,只有香港與國際開放互通嘅優勢蕩然無存,還有甚麼競爭力可言?
消息指新政府正研究縮短酒店檢疫至5日,加居家隔離兩日。這「5+2」顯然仍係嚴苛,事實證明疫情難清零,應該進一步將擾民措施鬆綁,「疫苗通行證」亦要盡快放寬甚至廢除。否則入境麻煩,生活費又貴,根本就係趕客!