功夫茶:社福開支年年增 安老問題要推新

2022年07月02日 00:03
東網電視
更多新聞短片
國家主席習近平喺風狂雨驟下,出席慶祝香港回歸25周年大會暨香港特別行政區第6屆政府就職典禮,還發表重要講話。佢提到要切實排解民生憂難:當前香港最大的民心,就是盼望房子住得更寬敞一些、創業的機會更多一些、孩子的教育更好一些、年紀大了得到的照顧更好一些。民有所呼,我有所應。新一屆特別行政區政府要務實有為、不負人民。要言之,就係切忌自說自話,自彈自唱,一味認巴之閉!
各位,習近平主席嘅話,何其精準有力,為官,就係要造福一方!上屆政府扶貧愈扶愈貧,安老服務全不到位,長者只感到「壽則多辱」!呢,今屆政府好應該審度時宜,為政以德,心中有民,才有望解決人口老化問題。呢嗱!政府投放喺社會福利嘅經常性開支,由1997/98年度約200億元,增至本年度預算嘅大約1,118億元,增幅達4.5倍。當然,同一時間本港亦面對人口老化問題,65歲以上嘅長者人口就由1997年底約67.8萬人,增至去年底嘅149萬人。社會福利嘅經常性開支,25年內增幅逾4倍,都幾勁!惟有學者坦言至今未見改善本港貧窮問題,貧窮人口及貧窮率亦不斷惡化,建議政府應在安老服務、貧窮問題上轉換思考模式,從結構性解決問題。
數字會講話,睇吓反映貧富差距嘅堅尼系數,1996年為0.518,2016年升至0.539,堅尼系數嘅數值由0至1,數字愈高,即係收入不均嘅現象愈嚴重。至於前年喺政策介入前嘅本港貧窮人口更逾165萬,可見貧窮問題愈趨嚴峻。學者坦言,本港由回歸至今,貧窮人口及貧窮率均一直未有改善,相反不斷惡化,認為若貧窮問題未能妥善處理,會衍生出其他社會問題。事實正是如此,本港金融業一片榮景,之不過財富效應卻沒有下達至廣大民眾,反而令貧富懸殊更惡化。
香港人口邁向老化,去年底已有149萬名65歲以上長者,政府如果冇好好去規劃,一味靠估冇辛苦,梗係唔掂啦!民生並非抽象空洞嘅概念,上屆政府花臣多多,又津助、又買位、又非牟利自負盈虧院舍宿位,可惜炒埋只得嗰3萬5千多個,杯水車薪,根本好多長者等到上天堂都未輪到「宿位」,可謂「含恨而終」!
有學者建議政府可考慮新照顧模式以協助長者,包括開展「居家安老」,以及增加社區配套,譬如照顧有困難家庭改用日計形式「上門護理服務」。功夫茶認為高官首要心中有民,正如習主席所說:行而不輟,未來可期。事實係知難不難,古人說,習勞為辦事之本;引用一班能耐苦之正人,日久自有大效。讓老有所依,把年紀大嘅長者照顧更好一些,當務之急其實係多興建宿位,唔好如上屆政府藉口多多,新班子更忌付出少少就輕言「犧牲」!丟了芝麻又話唔見西瓜,令市民好反感啫!