功夫茶:經濟委靡唔願生 惡性循環點樣掹

2022年07月18日 00:04
東網電視
更多新聞短片
眾所周知,繁衍下一代係動物嘅本性,人類一般稱之為「性慾」。為咗確保唔會滅絕,無論環境幾咁惡劣,好多動物都會繼續繁衍下一代!相對而言,人類就複雜得多啦;喺養育下一代之前,有好多因素需要考慮,假如話環境太過惡劣,有時寧願唔生添!呢嗱,本港出生率近年出現斷崖式下降,主因咪就係經濟倒退、百業委靡,經歷咗咁多屆政府苛政怠政,加上受疫情夾擊,港人連安居樂業,甚或個人溫飽都未能確保,又點敢生呢?
香港現時環境有幾差,查實大家都有眼睇!講到「性慾」喎,每個人或多或少,點都會有啲;就好似坊間流傳說法咁︰「邊有男人係唔鹹濕!」之不過,港人無分男女,為咗一日三餐疲於奔命,收工返到屋企,攰到即刻想瞓,食欲都未必有,何況性慾。再講,夫婦要「行房」,首先就梗係要有間房,但香港家吓有幾多夫婦係買得起樓,抑或排得到公屋呢?唔係冇,少之又少囉!其他夫婦要不就同家人同住,要不就捱貴租、住劏房;講到劏房,莫講話隔音呢啲咁「高級」嘅問題,幾乎連畀兩個人一齊伸展嘅空間都唔夠;做都做得唔爽,慾望自然大倒退!
嗱!「行房」只係一時三刻嘅事,好多方法解決到,但生兒育女係一輩子嘅事;所謂「養兒一百歲,長憂九十九」,一旦有計劃生育,就要考慮下一代成長環境、教育等問題,香港有邊一樣係做得好呢?港人樓都買唔起,成長環境真係無從談起;教育喎,睇吓之前幾多學生參與暴動,點放心呢?更重要嘅係,生兒育女係一樣非常花錢嘅事,成本非常高,但香港現時經濟衰退到一個點,係連大企業大公司都就快捱唔住,失業大軍不斷增加,在職貧窮嘅打工仔不在少數,自己都就快養唔掂,莫講話養多個小朋友啦!
出生率下降加上近期出現嘅移民潮,將對香港構成巨大影響,包括勞動力減少、人才流失、人口老化等等,甚至有機會造成惡性循環!其中適齡學童人口減少,對教育界可謂是首當其衝,港府會點樣應對呢?教育局局長蔡若蓮尋日提到,適齡學童人口減少係結構性問題,短期內難以改變,當局唔處理,問題就會愈滾愈大;查實蔡局長都認識到問題嘅嚴重性!不過,蔡局長提到將透過合併同停辦部分學校、重置不同地區嘅學生人口等方法,以穩定教學環境,提升學生嘅學習質素;呢啲方法似乎只係「治標」,甚至畀人一種「認命」嘅錯覺。
講到底,出生率低係問題嘅癥結所在,咁提高夫婦生育意欲,先係最有效解決問題嘅方法!有議員認為,港府可透過實際措施鼓勵港人生育,例如設立生育基金,增加子女免稅額等,其實都值得當局考慮!畢竟繁殖都係人嘅本能嚟,當生兒育女唔再係沉重負擔,市民自然願意生!