功夫茶:疫慌移民棄寵物 喵畫競投難治本

2022年07月26日 00:04
東網電視
更多新聞短片
天地有愛,人間有情。都說人生丟不下的是親人,忘不了嘅係朋友。有一種陪伴,雖然不語,卻感動了生命;有一種守望,既然無聲,卻溫暖了心靈。養過寵物嘅人,都會視佢哋為家中親人,家庭一分子;自己要離開香港,又怎捨得丟下牠們?
之不過,現實往往又係另一回事。港人近年興起移民潮,一家人移民,唔少家庭據悉係為子女升學前途,毅然將香港嘅一切,物業、事業都丟下。有緣即住無緣去,一任清風送白雲!以為隨緣便是盡性,卻不知隨緣嘅人,也必定「惜緣」、「惜物」。一隻貓、一隻狗,你養佢,何嘗不是隨緣而喜?然而,港人移民,唔少人竟丟下昔日寵物,令佢哋流離失所,自生自滅!
呢,為咗支援救助呢啲被遺棄嘅流浪貓狗,有團體將推出香港首次限量版喵畫NFT慈善競投,收益將全數捐助香港拯救貓狗協會。協會創辦人表示,因移民潮和疫情,近年佢哋接收嘅棄養貓狗個案大幅上升,家貓家狗所佔比例由兩成升至四成。協會近日每天都收到約10宗個案求助,但因資源所限,只能接收其中2至3宗,其餘就盡量轉介其他機構。協會喺疫情前接收流浪貓狗及棄養寵物嘅比例約為8比2,但因移民潮和疫情肆虐,令到更多主人選擇棄養,棄養原因不一而足。
嗱!有啲主人因貓狗移民申請手續繁複,兼且帶佢哋離港費用高昂;有些主人一早已立下壞心腸,根本就唔想帶佢哋走;有啲或因為買唔到寵物機位而最終放棄佢哋!此外,亦有本身居住喺店舖內嘅「舖頭貓」,尤其火鍋店執笠最多,主人因疫情生意大減而結業,「舖頭貓」頓隨店舖執笠而流離失所,諗起都悲催。
協會建議,即使打算移民嘅主人,可以喺網上群組了解其他人成功帶寵物移民嘅例子和心得;同時需要加強宣傳暫託服務,鼓勵養寵物人士參與成為流浪貓狗嘅暫託家長。「我們不會棄養家人」!協會強調,寵物既然係家庭一分子,主人家無論點困難都唔應輕言放棄丟下貓貓!希望是次「限量版NFT喵畫」慈善競投,可以籌到收益撥捐協會,以宣傳「愛貓貓,不棄養」意識,同時喚起更多助養者。
講開又講,本報大早曾獻「官辦貓狗善終園」,建議將雌雄貓狗分開圈養,等佢哋自然「百年歸老」,你話幾好呢?香港反正大把荒地僻島,有何難哉?前朝仁義不施,徒招惡名!若早聽東方言,何需今日又要勞煩有關團體出嚟大事張羅?講到尾,官辦之動物善終園先係長遠解決寵物被棄之道、治本之方,今屆政府切勿再失諸交臂!一念天堂,一念地獄,官老爺行行好吧?