功夫茶:輕鬆升中固可喜 移民潮下有隱憂

2022年07月27日 00:04
東網電視
更多新聞短片
莘莘學子喜洋洋,再進名校盡開顏。各位,功夫茶見東網記者採訪升中派位學子入到心儀學校,個個開心到飛起,又配以輕鬆悅樂,豈能不為之感染而鼓與呼!升中派位結果尋日放榜,雖然都見到有同學喊嘅場面,不過係喜極而泣吖!
今屆自行分配及統一派位階段獲派首三個志願嘅整體滿意率為95%,獲派首志願學校滿意率則為83%。有油麻地傳統名牌小學校長笑稱,今年佢哋學生獲派首三志願比率更創下歷年新高,逾94%,首志願亦達90%,成功入讀傳統直資名校嘅唔少。校長就表示,受移民潮及內地學生因疫情所限未能來港升學等因素影響,今年中一學額較以往充裕,學生入讀心儀學校機率大增。
家長見到自己仔女獲派第一志願,都難掩興奮和開心,佢哋揀校都係注重校風淳樸、學校有良好教學理念、交通配套好諸如此類。家長亦指出,今屆揀選心儀學校較進取,純因得悉傳統名校因移民潮流失唔少學生,是以「斗膽」進取啲博一博,依家博到自然鬆一口氣,將與家人一起食飯慶祝!天下父母心,恐怕多係「養兒一百歲,長憂九十九」嘅居多!「養兒防老」嘅相信不多吧!點講都好,功夫茶祝福佢哋未來學有所成,貢獻社會、國家,相信就係為人父母者得到嘅最大欣悅和安慰!
呢,從校長及家長嘅心裏話,今屆學生多開顏入到心儀學校,很大程度係因移民潮「帶挈」。早前教育局回覆議員提問時表示,喺2021/22學年,公營及直資學校嘅流失率亦創5年新高,分別達7.5%及8.4%,相較上一學年分別增加3.1%及3.4%,而流失人數方面,本學年公營學校教師流失人數達3,580人,直資學校達470人。教師整體流失逾4,000人,恐怕當中唔少都係趕移民!有校長表示,招聘教師嘅應徵信少咗九成,「教教吓書辭職」大有人在,一時請人都唔易!
嗱!教育局局長蔡若蓮曾歸咎於出生率下降,又話「移民不代表其不信任香港教育」、「未必對香港制度好不滿」云云。阿姐,教育唔同變魔術,手疾眼快就呃到人!事實都擺在眼前,師生再流失,殺校遲早來!教育靠嘅還是人,如果優良師資大量流失,教育質素如何保證?學生又流失,講真,想得天下英才而教育之固是奢望,連「集庸才而教之」都難如登天!再講吖!嚴苛禁聚令一再延長,一味點紅點綠;連派消費券都引入「DQ制度」,沙塵滾滾,殺錯良民,搞到天怒人怨!喂,咁只會趕客,都真係走吓一個又一個!正是:香港繁華紛紛落,移民潮下有隱憂!