功夫茶:程序繁複久拖延 知衰致歉要改善

2022年07月29日 00:04
東網電視
更多新聞短片
不是見到希望才堅持,而是堅持才會見到希望。之不過,有啲嘢死守規則而一成不變,又或者一味講求程序而昧於變通;醫管局管理層與前線醫護平時若然又冇乜溝通,分分鐘會因「機制」僵硬,堅持而變成「一遲足成千古恨」!
是咁的:罹患先天性心臟病嘅5歲「小鐵漢」Kansas,繼本月12日完成機械心瓣手術順利出院後,3日前即26日突然發燒,父母擔心係手術併發症馬上將佢送往天水圍醫院急症室,家人希望轉院至剛完成手術嘅香港兒童醫院,但因天水圍醫院冇兒科未能轉介,只能安排Kansas轉至設有兒科嘅屯門醫院再轉介。
「小鐵漢」父母透露,屯門醫院雖然有兒科病房,不過該院就冇心臟科醫生為Kansas診治,只能處方退燒藥。之不過,情況冇好轉,其父母一直希望院方能從速轉介兒子往香港兒童醫院,由主診醫生跟進;一來主診醫生跟開,知道「小鐵漢」病情,知頭知尾,點都放心啲!之不過,屯門醫院回應要等到早上,巡房醫生決定如何處理。由於轉介程序濕滯,以致延遲咗約17小時,才獲轉介至香港兒童醫院接受治療。
幸好Kansas情況冇惡化!但其父親日前於社交平台發文,怒斥醫院管理局轄下嘅公立醫院轉介程序繁複且欠缺彈性,質疑目前醫管局疊床架屋嘅醫療流程,係唔係可以保障病人免於被延誤治療?醫管局就事件致歉,並表示如心臟科評估個別病人有需要,可毋須經轉介,直接前往兒童醫院並入住心臟科病房。阿哥,早響吖!
做醫生,不論公院或私院,本應有「視病猶親」嘅使命,對病人要着緊,要當病人係自己親人嘅心態,尤其係一個歷經咁多手術「考驗」嘅「小鐵漢」,講真,佢都係小朋友啫,為人父母緊張係十分正常!醫管局就話,目前病人正在香港兒童醫院留醫,醫療團隊會為病人提供適切嘅治療及詳細跟進其臨床需要,並會盡力為家屬提供所需協助。
「小鐵漢」嘅父親經與前線醫護溝通後,直言唔少人均對醫管局現時機制及流程不滿,並透露各大醫院唔少個案均須經過類似繁複安排!
各位,呢啲「瞎折騰」只凸顯制度死板,醫療系統官僚!「小鐵人」嘅父親建議當局容許病童喺兒童醫院完成手術嘅特定時間內,若身體出現異常可直接去該院求醫,唔好再發生「小鐵漢」類似情況!呢種推己及人嘅精神相當可嘉!其實,醫管局事後先表示「有需要可毋須轉介」直往兒童醫院求醫,亡羊補牢,點都好過乜都唔做!都說「醫者父母心」,醫管局經一事長一智,應該再審視流程是否繁複,並與前線員工多作溝通,避免因「一遲足成千古恨」!