功夫茶:失業支援選擇性 為難手停打工仔

2022年07月30日 00:03
東網電視
更多新聞短片
俗語話:食人一碗飯,做到頭都爛;食人一碗粥,做到頭都禿。疫慌下百業蕭條,失業率大升,唔少打工仔手停口停,亟待援助。政府假假哋都係「父母官」,總不能自己高薪厚酬,衣食無憂,臥看山色醉看花,卻不理老百姓死活吖!
阿哈!呢個政府不太冷,早前煞有介事推出「臨時失業支援」計劃,成功申請者可獲一皮嘢,結果反應熱烈,共收到約47萬宗申請,計劃已批出約34萬宗申請,獲批宗數遠超政府預算嘅30萬宗,可見民生確實多艱!
據悉當中約10萬人不獲批,引來大量投訴。嗱!政府就指被拒者係因為不符合計劃資格,佢哋應該喺7月8日前提出覆檢。政府話審批時會貫徹寬鬆處理嘅原則,就合適個案行使酌情權,例如只差一、兩天便符合30天失業或停工要求,或失業期內從事散工嘅情況,只要申請人符合其他申請條件,均獲發資助;又話政府亦會以寬鬆嘅方法計算申請人喺2021年第4季嘅收入,務求盡量協助申請人滿足收入門檻。
之不過,實情又如何?政府所言又是否經得起檢驗?呢,有組織尋日公布該計劃覆檢求助個案中,七成個案覆檢成功,其餘三成,一成半個案不成功,餘下一成半個案仍在處理當中,結果反映政府審批過程存在疏漏,部分申請合情合理卻不獲審批,唔通真係「官」字兩個口,可以選擇性支援失業人士?
嗱!有組織舉咗好幾個實例,譬如有位梁生,去年10月22日開始被公司通知不用上班,一直至今年3月仍處於失業,佢喺計劃申請期前已失業逾30日,其申請卻不獲批核。經覆檢後,本來收到通知指申請被接納,之但係一個月後又收到不合資格短訊通知。大哥,基層失業已經夠徬徨,仲玩「蜑家雞,見水冇得飲」?一時有一時又冇,搞邊科?
仲有更荒謬嘅,有喺百貨公司做散工嘅阿June,2月25日起停工,是以申請有關失業支援,首次被拒,當局指佢當時仍在工作。阿June申請覆檢,今趟卻被當局以不屬於599F章表列處所嘅範圍為由拒絕申請。其後佢致電當局,指有朋友從事同樣工作卻成功申請。各位,你估官老爺點講?
官老爺要求阿June交出佢朋友嘅資料,仲話「我哋會取消番佢哋嘅資格!」喂!官老爺明顯叫人做二五仔,陷阿June於不義!為嗰一萬蚊出賣朋友?難怪阿June對當局嘅手法感到困惑!當局既然有心幫助水深火熱嘅失業人士,唔該畀啲誠意,攞個心出嚟!所謂「寬鬆處理」卻大玩選擇性和陰謀,好難睇啫!