功夫茶:劏房酷熱如熔爐 為避高溫瞓公園

2022年08月01日 00:03
東網電視
更多新聞短片
本港天氣持續酷熱,「酷熱天氣警告」已逾20多日,截至上月27日,已經有22個「熱夜」,係1884年有紀錄以來單月熱夜最多嘅一個月。天文台預料高溫持續到呢個月初,下周中後期有大驟雨及雷暴,屆時氣溫就冇咁熱!
過去一個月,連日高溫,長時間有陽光,天氣報告成日話:市區最高氣溫約36度,新界再高一兩度。熱成咁,都真係好難頂!咦,唔通咁叫做「熱夜」?「熱夜」唔係閃燈幻影下嘅勁歌熱舞,「將今晚今晚交給我」嗰種熱夜,亦唔係阿姐着魚網絲襪跳「熱咖啡」;係指全日最低溫度喺攝氏28度或以上,因全日出現最低溫度嘅時間喺晚間或凌晨,所以稱為「熱夜」。酷熱天氣警告期間,往往晚上氣溫仍高達30度!
各位,住喺劏房嘅市民,日間熱得交關,呢!有社區組織協會發言人尋日喺電台節目表示,唔少劏房戶都指家中太熱,部分鐵皮搭建嘅「天台屋」內更錄得攝氏43度高溫!可以想像,住喺裏面就如酒樓廚房嘅蒸籠,受盡氣!講真,溫度咁高,即使開大冷氣都於事無補!依然感到「熱到爆炸」!
該社區組織協會發言人指出,有劏房居民指屋內溫度較天文台錄得嘅最高氣溫高出6度,為避暑熱,要到公園瞓,起碼有啲樹蔭,地方空曠些,點都冇咁翳焗又悶熱,或等到半夜氣溫稍降先回家!阿哥,男人老狗就話去公園瞓冇大礙,若然劏房女住戶睇怕就唔多方便咯!你估真係會「愛上一個不回家的人」咩?
之前又見到電視台訪問一位住喺劏房嘅阿叔,佢一路吹住大風扇,啲汗就由額頭一滴滴涔涔滴下來!粒粒珍珠咁大,阿叔指間劏房恍如焗桑拿,張床係滾燙㗎!佢年過花甲,退休人士,消暑方法,日間就搭兩蚊巴士「遊車河」兼歎冷氣;晚上間劏房依然如蒸籠,根本瞓唔到覺,是以寧願出街瞓,伏喺樓下休憩處嘅石桌上,話出面暈咗有街坊知,喺劏房焗暈冇人知仲危險!劏房戶之悲歌唱不完,未知身為「父母官」嘅政府要員是否感受到?亦有劏房戶表示,因為家庭收入少,電費咁貴,唔敢長開冷氣,會喺半夜熄咗佢,改開風扇,雖然都難逃苦熱,鬼叫你窮啊,都冇計㗎!
各位,喺同一個電台節目,有天文台前台長就表示應該少開冷氣,以免惡性循環,令天氣愈來愈熱,佢仲話,市民應接受天氣熱,出汗唔代表骯髒喎!阿哥,呢啲咪叫做不食人間煙火囉!劏房戶屈室而居,好多連窗都冇,講啲咁嘅嘢,直頭離地千丈!喂!點解唔叫啲高官日頭辦公唔好開冷氣吖!流汗唔單止唔代表骯髒,仲排毒添!講嘢!