功夫茶:警黑勾結假冚賭 冰山一角非偶然

2022年08月05日 00:04
東網電視
更多新聞短片
現實往往比小說更離奇,也比做戲更荒誕!港產警匪片《無間道》,兵賊難分,原來並非黑社會電影先有嘅橋段,現實社會經常有,情節之妙更絕不下於拍戲。
呢,警方4年前派臥底滲入三合會,期間卻撞破反黑警員涉嫌與三合會合作,安排「假掃蕩」非法賭場。臥底更應涉案嘅反黑警員邀約到荃灣警署內,教導如何布置場地及賭具等。警員不但考慮到擺放現場物件要「像樣」,對被捕嘅賭客「戲子」要求更講究,特別叮囑及指明「唔要南亞裔、唔要唔夠秤、唔要通緝」等。總之「做媒」絕不馬虎,務求唔好秤砣掉落雞窩,搗蛋又砸窩!
之不過,好衰唔衰,黑幫派出負責接洽及處理呢次安排嘅,卻係警隊另一被指派去滲入黑幫嘅臥底警員,事件終被揭破!4名反黑組男警員與賭場負責人被捕,4警否認串謀妨礙司法公正罪,經審訊後,其中3人前日喺區院被裁定罪成,一人則罪名不成立。3名罪成被告還押至9月16日判刑。39歲嘅賭場負責人早前已認罪及被判囚8個月。
罪成嘅3名被告,法官裁決時表示,接納臥底及其他警員均誠實可靠,之但係認為3名被告均如臥底所指,於警署會面室中參與協定行為,意圖明顯有妨礙司法公正傾向,故此罪成。至於另一人,法庭未能肯定佢是否一直喺會面室,又或者曾參與討論,故未能肯定其知悉有關串謀或意圖,故裁定其罪名不成立。
各位,警黑勾結原來唔係警匪片先有嘅橋段,好似呢單嘢根本就係和尚頭上嘅蝨子——明擺着!係幾個差佬一齊勾結黑社會,絕非偶然,更非單一事件,事件反映警黑勾結只係冰山一角!香港回歸25年,警方反黑亦講足咁多年,問題係市民見到掃毒反黑叫到震天,而警察掃毒同海關相比,簡直不成比例;仲有吖,差佬偵破嘅,好多時都係啲後生仔女,相信係「替死鬼」居多,真正黑幫大佬卻永遠逍遙法外!
呢嗱!功夫茶都講過N次,警方經常掃蕩無牌樓上吧,其實呢啲酒吧盲嘅都知係藏污納垢之處所,亦係荼毒青少年之萬惡淵藪,根本一間都嫌多!何以佢哋掃極都有?各位,又會唔會係假掃場,真販毒,成為黑幫收入之來源?正如功夫茶常有疑問:香港之所以成為「毒港」,毒品愈掃愈毒,而黑社會未見收斂,是否佢哋恃有保護傘目無法紀?是帶勇之人淪「無間道」兵賊難分?要令香港社會河清海晏,不來一次「排空馭氣奔如電」嘅清洗太平地,歲月靜好豈可得!係啦,講開又講,中環黑幫槍擊案,就快3個月仲未拉到主要嫌疑人,你叫市民如何對「心繫社會」嘅警隊有信心!