功夫茶:長者悲歌奏不完 安老口惠實不至

2022年08月06日 00:04
東網電視
更多新聞短片
香港連續多年蟬聯全球最長壽地區,之不過,港人長壽係唔係福氣呢?喺香港,似乎未必,最主要係政府支援不足,長者難以安老。各位,喺街上常見有長者佝僂着背在執紙皮,更多長者等安老宿位「等到死」;講真,有幾多老友記可以靠乜乜年金過優質生活吖!喺香港,唔少長者體會到嘅係「壽則多辱」,思之令人心酸!
呢!有社區團體曾批評政府安老政策力度不足,「樣樣都有啲,但樣樣都要等」。等唔切,便經常出現倫常悲劇。日前土瓜灣樂民新村便發生一宗:一名姓張81歲老婦被51歲兒子發現喺家中昏迷,張婦送往廣華醫院搶救,其後證實死亡。警方經調查後,將案件暫列誤殺。據悉張婦患嚴重腎病,長期臥床兼需插喉洗腎,日前佢昏迷送院,醫生發現其身上喉管帶有血漬,懷疑事件有可疑。警方調查相信,事發時只有張婦與86歲姓李丈夫在家,張婦身上嘅靜脈導管被齊口切斷,懷疑係人為,因此拘捕李翁。
有關案件仍在調查,張婦死因有待驗屍確定,功夫茶亦不便多忖測。之不過,人口老化而不堪長期照顧病夫病婦嘅新聞,世界各地時有發生。嗱!就以香港為例,遠嘅不說,近啲如2021年北角便發生八旬老夫婦雙屍命案,懷疑年老丈夫難抵照顧長期罹患柏金遜症老妻,故以殺害老伴再輕生來結束折磨!事件引來社會關注照顧者「以老護老」嘅倫常慘劇,反映社會對長者關懷不足,支援亦非常短缺。
香港人口老化問題日益嚴重已係共識,政府一味紙上談兵叫人「居家安老」,可惜並無實質支援,更無長遠布局;反觀日本喺2000年就設立咗強制性長期護理保險制度,匯集來自僱主、40至64歲僱員和退休人士退休金嘅每月保費供款,作為長期護理服務嘅經費,以增加財政持續能力。此外,日本早以社區照顧取代住宿照顧,成為安老服務嘅核心,並獲分配更多資源。
勞福局局長孫玉菡表示,本港現時約有145萬名65歲或以上嘅長者,每年增加約10萬名,相信到咗2040年更會進入高峰期。佢尋日出席一個介紹各種智齡科技嘅展覽,表示政府早前斥資10億元,為業界提供資源配置發展智齡科技,認為此乃大趨勢,又認為未來需要加強支援照顧者,加上老人家也盼望喺自己嘅社區安享晚年,故如何喺社區推廣安老服務至為重要。安老扶貧,貴在實幹,切勿口水多過茶,口惠而實不至!既然要喺社區推廣安老服務,就係要增撥資源多建社區中心,有足夠社工及醫護關懷,協助貧窮獨居長者、長期病患嘅老年夫婦!一點關懷分分鐘就可避免一樁悲劇!