功夫茶:街市丟空大嘥鬼 善用資源咪浪費

2022年08月08日 00:03
東網電視
更多新聞短片
大年三十賣年畫──不能再遲了!功夫茶講緊空置咗12年嘅前旺角街市,發展一直存變數,一時話納入賣地表興建商廈,並喺賣地條件加入興建地區康健中心條款,有望成為最就腳方便嘅康健中心。
嗱!1977年落成嘅前旺角街市大樓,位於旺角廣東道和亞皆老街交界,因為附近多個街市落成導致攤檔空置率高企,終於喺2010年關閉。至2018年,由於區內缺乏基層醫療設施,加上區內市民強烈要求將前旺角街市改建為基層醫療服務設施,落實「公地公用」,服務市民。政府最終於同年11月,將興建康健中心納入賣地條件。
之不過,政府做嘢一時一樣,五時花六時變。呢,市建局喺2020年將該街市納為油旺研究嘅「發展節點」之一,康健中心計劃遭擱置,至今該區康健中心永久選址未定,惟政府會將康健中心改成「過渡選址」,最快2025年提供臨時地區康健服務。地區人士憂政府最終走數,惟即使係臨時亦應盡快落實供市民使用,同時亦應加強教育宣傳,讓這個位於核心地帶嘅康健中心真正令市民受惠。
政府成日叫市民咪做大嘥鬼,其實最大嘥嘅,面撞面,好面善,正正就係政府自己!有乜理由一塊黃金地皮一丟就係12年,情願養草餵蚊曬太陽,依家又話將佢改作康健中心嘅「過渡選址」,預計明年動工。阿哥,西風一夜催人老,凋盡朱顏白盡頭,仲唔係蹉跎歲月係乜吖?
呢嗱!講開又講,前朝政府施政經常「說了算」,吹水唔使本,市民都見怪不怪咯!最不堪嘅係,即使兌現承諾,有關設施一樣荒腔走板,得物無所用。各位,本報關心時事關心社會,喺上月24日頭版已指出「康健中心無作為 19億公帑枉費」!原本呢啲康健中心旨在分擔公院壓力,點知淪為「老人中心」,供長者歇息,曾有八旬翁戲稱,個康健中心叫佢減肥,轉介佢睇私家醫生!阿哥,你話係咪搞笑啊!
事實上,本報已指出嘥巨額公帑搞嘅地區康健中心已淪為豪華版老人中心,與提升全民預防疾病意識和管理個人健康能力嘅初衷背道而馳。本報記者曾走訪3間康健中心,發現人流冷清,與其美輪美奐嘅裝修形成強烈對比。有年輕人坦言從不知有康健中心嘅存在,即使知道,亦礙於政府形象老土而唔想使用!講咗咁多,功夫茶都係志在提醒當今政府,切勿只顧面子工程,成日烏啄啄,任人將!要說好香港故事,就係要做實事。今趟喺一個咁正嘅黃金地段興建康健中心,政府自不然要廣作宣傳,善用資源,畀一眾基層能夠好好利用,切勿再暴殄天物,重蹈前朝浮誇作風!