功夫茶:防疫嚴苛經濟差 百年老店都要瓜

2022年08月10日 00:03
東網電視
更多新聞短片
淒風苦雨,打風嘅日子,市面更顯冷清!疫情持續未受控,即使政府剛派了消費券,恐怕未能如財爺所說,市民嘅加碼消費,將可增強消費券帶來嘅乘數效應,對急需支持嘅本地經濟提供一定提振作用!振條毛咩?依家乜環境吖!
呢,百年老字號蓮香樓及蓮香棧於日前8號周一正式結束營業。蓮香樓前身是一間喺廣州西關嘅糕酥餅館,1910年起專營茶樓,並改名為蓮香樓。其後幾經租約和休業整頓,始終敵不過疫慌和潮流!最廣為人知嘅佢位於中環威靈頓街,其裝潢與內部嘅桌椅均保留了以前舊式設計,呢,連港產片《花樣年華》都在此取景,貪嘅就係佢嘅懷舊氣息!呢種老式嘅飲茶文化,如今年輕一輩相信已不懂欣賞!
今趟蓮香樓突然結業,一眾員工原來事前並不知曉,有員工都係尋晚凌晨透過蓮香飲食集團喺社交網站發公告先知;員工透露蓮香樓自今年4月起已拖欠薪金,問親老闆幾時有糧出?老闆一味拖字訣,話「遲啲遲啲,好快有集團注資」!點知拖吓拖吓拖到日前仲執埋笠添!啲老茶客想去懷舊吓大水煲沖茶、點心車上餡料澎湃嘅蓮蓉包、古法牛肉球都唔得咯,員工有汗出冇糧出,無奈只好集體操上勞工處求助。據悉,茶樓共有約20名員工,估計共拖欠薪金約150至200萬元。
講真,有生意做,一百幾十萬根本唔算乜大數目。之但係,「縱使有錢難買命,須知無藥可醫貧」!確實如此,持續逾兩年半嘅疫情,令經濟凋敝,尤其通關無期令各行各業睇唔到前景。防疫嚴苛,根本冇人想來香港,以往消費靠內地旅客及商貿客,依家「清零」,要靠本地市民,可惜疫慌下本港失業率仍高企,唔少打工仔不是手停口停,就係收入減少。何況前朝防疫措施寬緊無度,動輒收緊晚上堂食,搞搞吓,市民傾向家中自煮,做其「疫境廚神」,令業界晚市生意額大不如前。蓮香樓嘅四黃月餅好出名,可惜今個中秋只能成回憶啦!
呢嗱!餐飲聯業協會會長都表示,知道蓮香樓半年前已出現經營困難,生意大不如前,其中致命傷都係歸咎於新冠疫情,疫慌下封關,根本冇遊客前來光顧,加上政府推行嚴苛限聚措施,連本地客都趕埋,點可能維持生意?本報一再指出,「點紅點綠」嘅紅黃碼只應係過渡措施,下一步就要謀求一步到位,免除檢疫及社交距離。阿哥,當全世界主要地區早就冇入境檢疫限制,港府點簡化「3+4」都係比其他地方唔方便。有人話蓮香樓執笠,唔使驚,實有人搞復刻版!講真,如果真係要搞,都去一個冇咁多阿嫲煮飯嘅地方搞喇!係都去新加坡甚至越南搞喇!