功夫茶:滅鼠無能再捱轟 打擊黑點似做騷

2022年09月21日 00:03
東網電視
更多新聞短片
人生無奈,惟有等待。正當大家熱烈期待新一屆政府如何「能做事、做成事」,譬如以政務司副司長卓永興領軍,展開為期3個月嘅跨部門打擊衞生黑點計劃,自上月展開以來係威係勢,關注街道、後巷、街市、公廁、鼠患,甚至冷氣機滴水問題。針對600多個衞生黑點,儼然「清潔香港大行動3.0」新計劃,唔少市民都對政府咁大動作寄以厚望,今趟仲唔係「堅過石堅」?
「防鼠工作做得好,鼠患問題自然冇」!發你個春秋大夢冇咁早!上月下旬,本報接獲讀者報料,指牛池灣村近熟食街市一條巷,赫見大群老鼠趁打風前四出覓食,目測近20隻碩鼠左奔右竄,極度嚇人,功夫茶見到圖片都不禁汗毛直豎!
好啦!政府咁大陣仗話打擊衞生黑點,有組織喺政府開始計劃後進行調查,並喺尋日公布結果,發現有近五成市民表示唔滿意香港嘅衞生問題,亦有調查發現逾六成市民不滿意公共廁所嘅衞生狀況。有議員批評老鼠問題為「地方行政流弊」,如今老鼠唔單止18區橫行,老鼠入屋問題亦時有出現,反映鼠患極度嚴峻,而港府卻完全束手無策,呼籲當局提出令市民有信心嘅方法喎!
嗱!食環署署長楊碧筠指喺7月成立夜間防治鼠患流動隊和引入新科技,今年首7個月捕獲老鼠較去年同期多近兩成,又稱署方已引入熱能探測器和「T型鼠餌盒」等新科技協助滅鼠,並正探討制訂「綜合鼠患指數」,形容滅鼠工作成效顯著云云。
各位,高官嘅「自我感覺良好」勇氣可嘉,實情係高官一方面大搞清潔黑點滅鼠騷,最新鼠患參考指數卻顯示,本港5區中有4區嘅整體鼠患喺今年下半年有惡化,九龍城區更成為期內鼠患最嚴重嘅地區,該區嘅衙前圍道監測點指數於短短半年內惡化咗8個百分點。其餘如中西區、東區、觀塘嘅整體鼠患喺今年下半年均有惡化,高官嘅所謂「滅鼠工作成效顯著」,在市民眼中,卻係斷乜估,冇痛苦!
呢嗱!本月初又有讀者向本報報料,指北角渣華道近亞太廣場嘅一條後巷,顯示食環署放置嘅鼠籠捕捉到老鼠,籠下疑似鼠屍被鼠籠壓着並有烏蠅圍繞,而籠內活鼠疑抵受不了飢餓而啃噬死鼠屍體,報料讀者發現食環署多日冇去清理,死老鼠反構成衞生問題。咁啱早幾日,本報獨家踢爆外判蟲鼠組「除罩歎支煙,捉鼠等陣先」,食環署又懶監管。阿哥,以咁嘅鬆懈態度「全力打擊衞生黑點」,點會有良好嘅「關鍵績效指標」呢?秋風起,三蛇肥,睇怕捉「蛇王」易過捉老鼠喎!「清潔大隊長」卓永興仲話10月展開「改善市容」行動,功夫茶認為先搞乾淨個「蛇鼠一窩」先至講喇!