笑看天下:香港嘅醫生怎麼了?-施友朋 評論員

2022年09月23日 00:04
東網電視
更多新聞短片
香港嘅醫生怎麼了?上東網又見有消息指,警方先後再拘捕3名私家診所註冊醫生,並分別前往位於柴灣、元朗及天水圍嘅診所搜查,初步相信與濫發「免針紙」有關。警方亦就日前油麻地男醫生涉濫發「免針紙」被捕案件,拘捕多8名涉嫌購買免針紙嘅病人。
阿哥,醫生濫發免針紙,依家爆完一單又一單,而且收費一單貴過一單。呢,警方本月初喺元朗一診所拘捕一名64歲女西醫,佢涉嫌以每張500元開出免針紙,警方調查指診所於8月份發出逾6,000張相關豁免證明書。至於日前喺油麻地一診所拘捕年逾七旬嘅男醫生和3名女助手,據悉該診所以每張4,000元收費簽發免針紙,涉及最少2,000張,涉款估計約1,000萬元。
歌仔有得唱:求望發達一味靠搵丁!事實上,喺香港做醫生比起外國,地位特別尊崇,搵銀亦不困難,唔使一定係乜嘢「權威」或某專科「聖手」,只要掛到牌嘅私家醫生,基本上睇傷風感冒簽吓假紙,收入都相當豐厚!行醫到年過花甲甚至古稀之年,照計身家唔會差得去邊,點解仲要冒刑責之險而搏到咁盡?世衰道微,連醫生應有嘅責任和醫德都可盡拋?香港「惡性循環」之風果然威力無窮!
有大律師指使用假免針紙以欺騙方式進入處所,同呃保險、病假相似,有可能觸犯行使虛假文書或串謀詐騙,刑責與製造虛假文書一樣,最高可囚14年。政務司司長陳國基喺臉書強烈譴責濫發免針紙嘅無良醫生,並表明追究使用這些免針紙市民嘅刑事責任。
治亂世用重典幾時都冇錯!至於罔顧醫德濫發免針紙嘅醫生,一個都不能輕判,皆因會影響真正需要免針紙嘅用家,風頭火勢,依家仲有醫生肯簽嗎?