功夫茶:工業意外創新高 職安監管勿放鬆

2022年09月30日 00:04
東網電視
更多新聞短片
常在河邊走,哪有不濕鞋?呢,若然常喺地盤工作,哪有不受傷?各位,據勞工處嘅資料顯示,喺2021年,建造業嘅致命工業意外數目和每千名工人意外率,均係各行業之冠,前者共錄得23宗,係近5年新高,亦係所有行業嘅5倍;而每千名工人意外率則為29.5,接近所有行業嘅兩倍。
舞台很危險,會有墮屏意外;地盤更危險,會塌天秤;鐵閘都危險,不久前曾壓死一名女保安員;八鄉打石湖村回收場,男工遭碎膠機夾腳,大量失血亡。本港早前發生多宗嚴重工業意外,最為轟動嘅,當推秀茂坪安達臣道地盤天秤塌下造成3死6傷,事件再次引起各界關注目前香港保障職業安全條例是否足夠。
呢,申訴專員趙慧賢尋日公布展開主動調查,審研政府對建造業職安及健康嘅監管。公署會向勞工處、屋宇署和發展局展開主動調查。申訴專員正搜集上述課題嘅資料及意見,市民若有任何意見,可於下月底之前以書面方式送達申訴專員公署。
業界表示歡迎,認為調查有助向政府相關部門施加壓力,提升工業傷亡關注度。事實上,多數工業奪命意外,除了工人本身疏忽,更多時候係監管不足,敷衍累事。呢嗱!好似冧天秤意外,有工程師找出文件圖則,懷疑工程人員偷工減料,燒焊人員並冇按天秤機座設計要求,接駁口燒得唔夠厚,底焊部分完全被省略。喂!大哥,以博大霧走歪路嘅工作態度應付咁重要嘅焊接工程,唔出事至奇!
為提高職安健法例嘅罰則,勞工處喺今年5月向立法會提交《2022年職業安全及職業健康法例(雜項修訂)條例草案》;另立法會人力事務委員會下月18日議程中,亦會特別加插議程,討論「改善建築地盤職業安全的政策及措施」。立法會人力事務委員會主席表示,期待法例能夠盡快順利完成審閱,落實相關法例加強罰則,以提高職業安全健康水平。功夫茶覺得加強罰則或可以令各方主事者有所儆醒,之不過,每個崗位嘅把關人員,要有嚴謹、負責任嘅工作態度,加強執法及巡查,皆因「徒法不能自行」!
正如有工程界人士指出,上層嘅人有冇好好咁訓練工人安全意識,或者畀足夠嘅壓力佢哋呢?人好簡單,就係會貪便宜走捷徑!人命關天,非同兒戲!申訴專員見到咁多致命工業意外發生,情況確令人憂慮。生命無價,大家都感慨工業意外一宗也嫌多,實情係每宗意外,尤其奪命意外,無不見證一座城市嘅制度是否完善,有關人員是否處事不敷衍。若然事過境遷,又當冇事發生過,好了傷疤忘了痛,只會惡性循環,加速互信嘅崩塌,加強罰則又係口水多、無尿屙!