笑看天下:謊言最終會扯不下去-施友朋 評論員

2022年11月25日 00:04
東網電視
更多新聞短片
香港高官愛玩「語言偽術」和「數字遊戲」。近排公共事業和公共交通大刮加風,政府被狠批為把關不力。呢,中電及港燈明年一月加電費,按年升幅分別達到19.8%及45.6%。環境及生態局局長謝展寰早前喺立法會發言時,將明年一月電費與本月比較,表示加幅分別只有6.4%與5.5%,被質疑誤導市民。其後,局方解說政府監管兩電嘅角色和與兩電磋商電費檢討嘅工作,無意淡化加幅,對於當日發言可能引起誤會,往後會多加留意。點講都好,兩電賺盡8%准許利潤,根本冇履行社會責任,與民共度時艱;而政府把關不力,且為兩電「護航」,難辭其咎!
呢!房屋局局長何永賢不久前表示,政府關心劏房問題,當局全力興建傳統公屋之外,也會興建約3萬個「簡約公屋」單位,同時繼續推展興建中約兩萬個「過渡性房屋」單位。佢相信多管齊下,10年後環境惡劣而又收取高昂租金嘅劏房,將不能生存。佢牛皮愈吹愈大,指10年後冇「劣質」劏房,呢句大言不慚嘅官腔,同說10年後香港再無窮人一樣咁荒謬!這不是「語言偽術」是甚麼?
尋日何永賢就話:當局正物色約6個選址作為首批「簡約公屋」,每個項目提供逾千伙,冀給予公屋申請者「多個選擇,過渡得好啲」。老朽唔知何永賢局長是否得了《書經》的指引和教訓,學會了謙虛,不再噏得出就噏!解決房屋問題,就係要覓多啲地建公屋,依家啲「簡約公屋」係沒有辦法中嘅辦法,佢話「多個選擇,過渡得好啲」,聽起來不是大體又務實得多嗎?為政貴在行而不在吹!所謂「以實則治,以文則不治」。口惠而實不至,為政即係廢!何況語言偽術,扯到最後,謊言還是會出現扯不下去嘅困境!咁,何不老實些?