功夫茶:無憂無慮談何易 缺失太多如浮萍

2022年12月07日 00:03
東網電視
更多新聞短片
疫慌持續3年,出現防疫疲勞乃人之常情,更何況港府防疫抗疫張弛無道,叫港人無所適從。有人會說「境由心生,我自得其樂,無憂無慮,快樂極了」嗎?如果真有咁嘅人,政府就唔使挖空心思,到處張羅要如何「說好香港故事」啦!
呢,明末清初才子金聖嘆作《三十三不亦快哉》,佢快人快語,讀來令人快意無比,之不過,快意之事未必人人盡相似,因為觀點不同、時勢有異,這道理不難明白。事實上,港人嘅幸福感一向不高,經過3年疫慌,都唔使問阿貴,有乜可能會食屎食着豆,忽然幸福起來吖?嗱,根據聯合國早前公布嘅2022年全球幸福指數排行榜,香港排名81,仲低過排名72嘅中國。時勢有變,香港人嘅幸福指標又如何呢?
各位,近日有機構就社會幸福指標進行民意調查,結果顯示10項社會幸福指標之中,有3項包括安居、生活無憂無慮和享有政治權利,均低於合格水平。當中生活無憂無慮嘅指標為眾多項目中最低分,機構認為結果反映港人評價偏向負面,認為生活非無憂無慮,以及未能安居。
講真,港人有可能安居嗎?功夫茶不久前先指出假難民、南亞兵團周街劈友、追斬同鄉如家常便飯,佢哋無惡不作,行劫、販毒、聚賭丶非禮、加入黑幫等一浪接一浪,將「罄竹難書」呢句成語發揮到極致,令香港變成「動感之刀」!事實上,假難民變成香港尾大不掉嘅毒瘤,搞到香港雞毛鴨血!依家財赤料超過千億元,香港庫房水緊,每年仲要耗費十多億元養佢哋,一提起就令人無名火起,點會有絲毫幸福感吖!
呢,講到生活無憂無慮,更是令人百感交集,疫慌以來,經濟下滑,百業蕭條,打工仔收入大減卻面對加風熾熱!仲有港鐵不足一個月兩度發生嚴重事故,唔係甩車門,就係壞車卡,而且多數發生喺上班嘅繁忙時間,搞到打工仔想準時返工都好似要靠彩數,你話想生活無憂無慮,不是癡人說夢嗎?返工要戰戰兢兢恐防港鐵又出事,認真冇厘癮頭!至於人身安全、享有個人自由、有合適就業機會、免於恐懼、弱勢社群得到保障、司法程序公正以及兒童成長快樂嘅評分,都係差強人意。
大家有目共睹,香港近年掀起移民潮,各行各業都流失唔少人才。最新一份《中學概覽》尋日發布,全港共有44間官津中學嘅中一需要減班,按年合共減46班,當中包括多個地區,有兩間甚至已停收中一,意味會殺校。香港面臨太多困境,人口流失、老化、出生率低;港人缺失太多恍如無根浮萍,港府要為市民謀幸福,看來要加把勁,切勿口惠而實不至,一味畫餅充飢,始終係風扇底下傾偈,講風涼話而已。