笑看天下:菲總統平衡力一流-施友朋 評論員

2023年02月02日 00:04
東網電視
更多新聞短片
當前國際形勢充滿激盪和矛盾。烏克蘭總統澤連斯基一直不忘伸手向美國及西方國家乞求軍事援助,除了主戰坦克,就係死纏要歐美多國使用嘅美製F16戰機,指「戰機係令俄羅斯化為肥料嘅最強組合」。之不過,美國總統拜登周一明確表示不會提供烏方夢寐以求嘅F16戰機。法國總統馬克龍則在同一天表示,不排除戰機援烏嘅可能性,但前提係不會升級緊張局勢及用於攻擊俄羅斯領土。
看來,法國總統都係吹水成分多,美國都推搪不會以戰機援烏,法國總統嘅所謂「不排除」,依老朽看,係擺姿勢多於實際,尤其話「唔好用於攻擊俄羅斯領土」確係好搞鬼,就好似你畀食物一個餓咗幾日嘅人,卻煞有介事話畀佢知:「唔好用嚟填肚呀!」大家不覺得矛盾搞笑嗎?
呢,不妨又睇吓美媒報道,美軍繼大規模調整喺日本嘅軍事部署,又希望達成協議,讓菲律賓向美軍開放多4個軍事基地。美國就話會向菲國提供包括無人機在內嘅軍事援助,以便菲軍能夠監察南海情況。事實上,中國係菲律賓嘅最大貿易夥伴,小馬可斯自去年6月就任菲總統以來,同年9月即出訪美國,顯然係想修補上任總統杜特爾特同美國關係嘅窘態,之但係又要對中國表示友好,是以上月初到訪中國晤習近平,雙方發表聯合聲明將重啟南海油氣談判,妥善處理海上問題。
面對中美角力以至台海衝突風險,小馬可斯深明平衡不易,佢引用非洲諺語指「兩象相爭下,惟有草地輸」,並稱「我哋就係那片草地,而中美就係那兩頭象,所以我哋要非常、非常謹慎」。小馬可斯知道自己嘅處境,不像烏克蘭戲子總統不知天高地厚;冇自知之明一味自吹自擂,最終會輸得好慘!