功夫茶:加煙稅益咗私煙 報攤嘆生意大減

2023年03月19日 00:04
東網電視
更多新聞短片
煙民都知道「吸煙危害健康」,之不過吸開煙嘅煙民都有一股「民不怕死,奈何以死懼之」嘅無畏精神,佢哋唔怕死卻最怕辣加煙稅增加負擔;另一方面,政府又要進一步壓低吸煙率,大條道理為市民健康着想,而吸煙與健康委員會就贊成大幅增加煙草稅,指「吸煙成本上升,煙民難以負擔貴煙,自然會選擇戒煙」。
吸煙問題,多年嚟糾纏於煙民健康與醫療成本、煙稅與私煙等爭拗,這已成為社會、文化和經濟學者嘅調查和研究對象。最常見嘅說法係增加煙稅無助戒煙,反而會令販賣私煙更猖獗,罪行大增。呢,海關過去3星期展開反私煙特別行動,偵破119宗案件,檢獲超過6,800萬支懷疑私煙和約6公斤懷疑未完稅製成煙草,估計市值約2.5億元。利之所在,私煙確實禁之不絕。
上月《財政預算案》即時增加煙草稅逾30%,香煙售價增至約78元一包,令一眾以售賣煙草產品為主要收入嘅報攤,首當其衝受到影響。有喺旺角經營報紙檔嘅檔主表示,因應煙稅增加,整體生意跌咗近50%,假設平時賣100包香煙,依家賣得50包,冇咗大半生意,唔傷就假!
唔少報攤檔主反映,紙媒式微,每日銷紙確實有限,加上現時持小販牌嘅報紙檔受政府限制,只可出售12款特定物品,除報紙,仲有香煙、樽裝水、電芯及電話卡等,賣煙係其中一個主要收入來源,依家少咗大半買煙客,唔通佢哋因加價就戒煙咩?冇錯,有啲煙民或許會「慳住食」,之不過,更多煙民轉投非法私煙市場!有熟客向報攤檔主承認去買私煙。大哥,私煙只賣20幾蚊包,同正價煙相差一大截,你話報販點同佢哋爭吖!檔主又大呻,幾乎人人都收過「點心紙」,即私煙宣傳單張,但就無人執法!講真,樓上無牌酒吧、毒品快餐車咪又係掃極都有,何況派「點心紙」?
加煙稅影響報攤小販生計可謂立竿見影!報販正處於水深火熱中,憂慮今趟加煙草稅會掀起「摺檔潮」,促請政府加大力度打擊私煙;同時盼望政府體恤民艱,修訂法例放寬售賣產品同可展示廣告嘅限制,畀報販利用攤檔空間出租張貼廣告,即使一千幾百都係幫補!有學者指出,加煙草稅作為一項單一嘅間歇性政策介入,對於降低吸煙率嘅成效,其實比委員會聲稱嘅來得低。也許以往加煙草稅確成功讓部分煙民戒煙,之但係政府若然冇辦法準確掌握加稅幅度,鹵莽地大幅增加煙草稅,變相懲罰基層市民食貴煙,又無法徹底打擊私煙,效果只會適得其反!民生無小事,還是先放寬售賣種類和廣告限制,畀條生路報攤檔主行吓喇!